Gou dawz sa dauqma ndaw ranz, dwk haeuj ndaw habhojcaiz bae, mwngz couh guhneix naeuz: “Guhneix mbouj ndei lo, gyuek deihbanj bw.”

Meh goj ciengzseiz dawz sa haeuj ndaw ranzbanhgoeng bae, de dawz sa coq haeuj ndaw bingzgingq iq baij rim gwnz daiz de bae. Boh ha, boh vihmaz cungj mbouj naeuz meh yienghneix guh mbouj ndei, gyuek aendaiz ne?

Mwngz naeuz, doenghgij bingzgingq duh meh heuhguh batdajndaem, sa ndawde dwk miz haujlai cungj cehfaen ywdoj, hawj gyoengqde did nyod, maj baenz gomiuz——nyaenx dwg hong meh.

Hoeng, boh ha, neix goj dwg hong gou bw! Lwg mbouj miz doenghgij batdajndaem aeu gingq guh de, miz habhojcaiz ndwi; hoeng sa ndaw habhojcaiz duh gou goj dwk miz lailai cungj rinreq bw, saek gijmaz cungj miz caez——doenghgij rinreq de lij dwg daj haenzraiq gip dauqma bw! Gou goj yaek hawj gyoengqde did nyod, maj baenz faexlwg, daengzcog couh baenz lailai ndaek rinreq gyaeundei.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）