Miz ngoenz ndeu dwg singh- gizroek, rumz cififi, nditrongh raeuj- rub, dauqcawq va rang roeg hemq, gou caeuq daxboh daxmeh bae Gunghyenz Majcaujgyangh guhcaemz.

Yamq haeuj bakdou, heux gvaq gizdieg dingz ci, couh daeuj daengz diuz roen rinmaxluenx lo. Loh din caij youq gwnz rinmaxluenx, liengzsisi, youh lumj miz vunz bang daejdin mwngz gaeu humz, geijlai mizyinx ha! Bouxlaux ciengzseiz daeuj byaij ne!

Caiq byaij baenaj couh daengz aen giuz ndeu, heuhguh “giuz ingj ndwen”. Dingqgangj moix daengz ronghndwen ndwennduemj seiz, daengx ranz vunz youq gwnz aen giuz neix guhbaiq, siengj gijmaz couh ndaej gijmaz bw.

Byaij gvaq giuz, couh daeuj daengz giz diegnywj gvangqmyang- myang ndeu, gwnz diegnywj geijlai nauhyied ha：Gyoengq vunz miz mbangj angq cuengq yiuhrumz, miz mbangj comz youq guhdoih dwk bej, miz mbangj doxgangj riuhaha, bouxboux cungj vuenyungz raixcaix!

Daj diegnywj byaij sat ngeux haeuj baihgvaiz, couhdwg gizdieg lwgnyez guhcaemz lo. Baihndaw miz feihgih、bungbungceh、dwk lanzgiuz、gueng bya……Gou ceiq gyaez naengh ruzcaeghaij. Hoeng, gizneix vunz lai lai lo. Gou caeuq daxboh baiz doih cawx biuq, caj haujlai nanz cij daengz.

Baez cawx ndei biuq, gou sikhaek buet coh ruzcaeghaij, genj naengh baiz ceiq doeklaeng. Daxboh sing iq naeuz：“Daeglwg ha, naengh baiz ceiq doeklaeng, gingyiemj raix- caix, mwngz mbouj lau ha?”Daxmeh heuh gou naengh youq baiz cungq- gyang. Gou bek najaek riu naeuz：“Mbouj, mbouj, lau gijmaz ha, yied gingyiemj yied mizyinx ne!” Gou caeuq daxboh naengh ndei lo, daxmeh mbouj dingz bang dou ingj siengq. Aen ruzcaeghaij menhmenh bibuengq lo, daih’it baez naengh cungj ruz neix, sim gou geijlai gikdoengh ha! Aen ruzcaeghaij yied bi yied sang, yied bi yied vaiq, gyoengq doih gwnz ruz angq hemq mbouj dingz, daengz giz ceiq sang seiz, gou baez yawj coh baihlaj, roxnyinh miz di lau, couh fwt hemq hwnjdaeuj：“A, gouqmingh ha!”Caj yaep ndeu, aen ruzcaeghaij couh dingz roengzdaeuj lo. Geijlai mizyinx ha, gou ndaej naengh gvaq sim’angq ne!

Daengz banngaiz lo, dou sij mbouj ndaej lizhai lo. Aen Gunghyenz Majcaujgyangh, mwngz caen gyaeu- ndei! Baezlaeng gou lij caiq daeuj mwngz gizneix guhcaemz bw!

（lauxsae son’gyauq：Couh Yuz/周 旭）