Gou miz daegnuengx ndeu, de gig ndei- gyaez, danhseih hix gig manz. Dwg boux “vuengz buqvaih” okmingz.

Miz baez ndeu, daxdaiq cawx geij duz bya ma ranz, gou caeuq daegnuengx angq raixcaix, couh caemh gvaqbae yawj. Gij bya neix youq ndaw raemx swyouz cwxcaih dwk youz bae youz dauq, gig vaiqvued ha！Daegnuengx siengj iet fwngz lumh bya. Gou lanz de naeuz：“Mbouj ndaej, gij bya neix deng doeksaet, yaek haeb vunz bw.” Daegnuengx yied dingq yied roxnyinh geizheih, mbouj dingq vah, couh iet fwngz bae lumh duzbya, fwngz de baez bungq deng rieng bya, bya deng haep le dauqcawq bongh bae bongh dauq, lij bungq deng fwngz daegnuengx, daegnuengx “a” sing ndeu couh riengj suk fwngz dauqma, byawz rox, mbouj siujsim deng doengj laemx lo. “A！”gou caeuq daegnuengx haep dwk hemq hwnjdaeuj. Daxdaiq dingqnyi le, sikhaek gvaqdaeuj yawj, hojsik bya gaenq swnh miengraemx lae deuz lo. Dou haemh haenx couh mbouj miz bya gwn lo.

Lij miz baez ndeu, daxdaiq rag ci byaek rim ndeu daj ndaw naz dauqma. Deng ginggvaq aen bo raezrangrang ndeu. Daxdaiq rag ndaej gig dwgrengz, heiq conhfofo, hanh lae mbouj dingz. Daegnuengx yawjraen le, couh buet bae bang doi. Hoeng ci gaenq doi hwnj daengz dingj bo, daegnuengx lij haenq rengz doi ci, doeklaeng ci vaiq lai lo, daxdaiq cap ci mbouj dad, gig mbouj yungzheih ci doi hwnj gwnz bo lo, youh yienghneix daj henz bo ringx fan lo. doeklaeng ci vaih lo, byaek sanq liux lo. Daegnuengx caen dwg guh gienh “saehndei hung” ndeu.

Miz gienh saeh ndeu ceiq hawj gou haeb heuj yaek dub de geij mbat ndeu. Bi’gvaq seizhah, mbwn ndat baenz youq gwnz namh cien gyaeq ndaej cug bae. Sietdiuz ngamq dawz okdaeuj mienh gwn mienh yungz. Bohmeh raen dou song beixnuengx ndat baenz ndoj youq ndaw ranz gunghdeuz hix mbouj sangj, couh hawj dou cawx aen youzyungjciz cungheiq ndeu, dou angq raixcaix. Daengzlaeng miz baez ndeu, gou caeuq daegnuengx doq youzraemx doq gwn gijgwn ringgangq, daegnuengx gwn liux le yaek dawz cukcien bae vut, byawz rox deng daemjndoet, laemx roengz raemx bae, ndaw fwngz cukcien baek vaih youzyungjciz, youzyungjciz couh laeuh heiq, mbaep lo, raemx lae okdaeuj lo. Yawjraen yienghneix, gou huj dwk yaengx gaemxgienz coh daeg- nuengx.

Daegnuengx gou caen dwg boux “vuengz buqvaih” dahraix. Dangyienz，hix dwg aenvih de, gij saedceij gou cij bienq ndaej fungfouq lailai.

（lauxsae son’gyauq：Mungz Cwngzgen/蒙成建）