Duzlingz iq gig coengmingz haengj hag, hoeng de dam saj, gingciengz lumz guh saeh, ndigah daxmeh gingciengz ndaq de.

Miz baez ndeu, duzlingz iq cuengqhag ma ranz, daxmeh cam de：“Haemh neix miz gijmaz cozyez aeu sij？”“Miz……miz……”Duzlingz iq lumhlumh gyaeuj，naj hoengz dwk gangj：“Daxmeh, gou lumz lauxsae anbaiz gijmaz cozyez lo.”Mehlingz dingq le fatheiq dwk naeuz：“Baezbaez cungj dwg yiengh- neix, guhcaemz mbouj dingq lauxsae gangj, youh aeu gou daj denva cam lauxsae, lauxsae cungj nyap liux lo, mwngz mbouj najmong gou cungj najmong liux lo. Haemh neix gou mbouj caiq daj denva hawj lauxsae, mwngz gag siengj banhfap ba.”Duzlingz iq dingq le, rox swhgeij guhloek le, gouz daxmeh naeuz：“Daxmeh, cingj mwngz caiq hawj Yiengz lauxsae daj baez denva ndeu, baez neix gou caenndang cam Yiengz lauxsae.”Mehlingz mbouj miz banhfap, cij ndei daj denva hawj Yiengz lauxsae. Duzlingz ciep denva cam：“Yiengz lauxsae，gou lumz dingq haemh neix sij gijmaz cozyez lo, cingj mwngz caiq lwnh gou nyi, ndaej lwi？”Yiengz lauxsae youh caiq lwnh duzlingz dingq, lij naeuz duzlingz：“Duzlingz, mwngz ngoenzngoenz daj denva cam cozyez mbouj baenz, mboujne mwngz cawx bonjbouh ndeu, dawz gak cungj saehcingz geiq youq ndaw bonjbouh, danghnaeuz mwngz lumz saehcingz le, couh hai bonjbouh yawjyawj.”Duz- lingz iq raen neix dwg banhfap ndei, couh yienghneix guh lo. Daj seizhaenx heij, duzlingz iq guhsaeh couh miz diuzleix lo.

Miz ngoenz ndeu, daxmeh bae cawx doxgaiq, duzlingz iq youq ranz yawj saw. “Dinghling- ling……”denva yiengj lo, duzlingz iq ganjmuengz bae ciep denva, yienzlaiz dwg mehgux daj daeuj. Mehgux naeuz：“Duzlingz iq, ngoenz neix gou bae ranz mwngz guhcaemz, lwnh meh mwngz 9:00 daeuj hojcehcan ciep gou.” Duzlingz iq han le, couh youq ndaw bonjbouh geiq“9:00 bae hojcehcan ciep mehgux。”

Mehlingz ma ranz le, duzlingz iq naeuz：“Daxmeh, mehgux hawj mwngz 9:00 bae hojcehcan ciep de.” Daxmeh dingq le han：“Ndei.” Ciepdwk youh cam：“Mwngz seizlawz geiq saehcingz ndaej cingcuj baenzneix？”Duzlingz iq riu naeuz：“Gou dawz gij saeh neix cungj geij coq ndaw bonjbouh bae lo.” Gangjsat, duzlingz couh dawz bonjbouh neix hawj daxmeh yawj. Mehlingz baez yawj, va! Ndaw bonjbouh de geiq haujlai saeh ndaej deihyaenyaen. Mehlingz haenh de guh ndaej deng, duzlingz iq riu lo.

Daj seizhaenx heij, Duzlingz iq yungzheih lumz saeh haenx menhmenh bienqbaenz duzlingz coengmingz lingzleih youh dwggyaez .

（lauxsae son’gyauq：Vangz Gveiyangh/黄桂香）