Veiz yaucangj gingqgyaez:

Mwngz ndei! Ngoenzneix gou daeuj nyauzluenh mwngz lo, hawj mwngz daez di genyi ndeu, hawj hagdangz raeuz bienq ndaej engqgya gyaeundei. Lajneix dwg gij siengjfap gou, cingj mwngz nyinhcaen dingq.

Mwngz hix rox, seizneix hagdangz raeuz aen “Suen Dajndaem”cungj dwg ndaem go’gva, ndaem go’duh caeuq go’byaekheu, lij ndaem go’oij caeuq haeuxyangz daengj doenghgo. Aenvih daihgya cungj laihnaeuz“ndaw singz ndaem gova, lajmbanj ndaem go- byaek”, ndigah, hagdangz raeuz mbouj ndaem gova. Gou nyinhnaeuz：Cingq aenvih lajmbanj raen va noix, engqgya wnggai ndaem, neix youq hagdangz lajmbanj youh dwg lingh aen fungh- gingj moq ne. Doengh go’byaek gooij dwg daegsaek lajmbanj, hoeng gij doenghgo neix rog doenghnaz miz haujlai, lwgnyez youq gwnz loh byaij daeuj hagdangz haenx cungj ndaej yawjraen. Vihliux hawj daihgya yawj funghgingj, gou dajsuenq dawz go- byaek caeuq gova doxcab mdaem, hawj aen suen dajndaem engq yienjok“gwnzsingz lajmbanj doxgap”, gou miz seiq aen siengjfap baihlaj:

Aen daih’it dwg genj song gaiq reih baihdoeng dieg namhbiz daeuj ndaem gova. Lw roengzdaeuj ne, couh youq gyang reih ndaem go’byaek, youq henz dinreih ndaem gova ndei dajleix haenx. Ndaej ndaem va’gut, vayezgi, varibfwngz daengj. Yiengh- neix, gij va neix ndaej dangguh dinsuen, youh ndaej hawj daihgya yawj suenbyaek seiz, youh lai ndaej yawj aen gingj ndeu, caen dwg sim soeng da sangj lai lo.

Aen daihngeih dwg song gaiq reih ndaem gova haenx, ceiq ndei dapbungz, hawj gaeu gova ndaej raih, lumj valahbah、gaeusaidoengz, va- ciengzveih, sam cungj va neix minghgeng, dingj ndaej nonhaih, va hung youh lengj, saek ronghsag gyaeundei, yinx lwgda vunz, hawj vunz sim maez raixcaix. Daegbied dwg gaeusaidoengz caeuq vayezgi, sam seiq cungj saekva daxcab, maj ndaej gig vaiq.

Aen daihsam dwg ndaem va le, ceiq ndei aeu bwnhranz daeuj dwk, lij youq henz laeb gaiq baiz: “Cingj mwngz gaej sieng sim gova”, yienghneix ndaej yawj va, youh ndaej son’gyauq gyoengq doengzhag gyaez doenghgo sengmingh.

Aen daihseiq dwg faen hawj gak ban doengzhag dajleix, hawj gyoengq doengzhag sim haenh guhhong, ndaej rox “guhhong ceiq miznaj”.

Baihgwnz neix dwg gij siengjfap gou, maqmuengh yaucangj dawz haeuj sim.

Cukhoh mwngz:

Ndang cangq, yienghyiengh cungj ndei!

Gauhcan Siujyoz loeg nienzgaep it ban Vangz Maucinz

Bi 2019 ndwen 6 ngoenz 18

(lauxsae son’gyauq：Veiz Gyanghbingz/韦江萍）