Youq ndaw saedceij, miz haujlai“baez daih’it”, gou aeu dawz gijhaenx yo youq ndaw simdaeuz. Geiq ndaej gou baez daih’it suek faengx——Seiz haenx gou cij ndaej 7 bi, miz geijlai boux lienz siengj cungj mbouj gamj siengj, hoeng gou gaenq caen fwngz suek faengx lo!

Miz baez ndeu ranz gou doengzcaez suek faengx. Seiz- haenx gou daekeiq riu dwk, gou raen ndaw buenz gwnz daiz baihnaj gou haenx cang rim duhheu caeuq nohmou, henz din dwg ndij haeuxnah hau- sagsag, lij miz baenz swx rongfaengx. Hahaha, gou couh yaek caeuq daxboh daxmeh caez suek faengx la! Bohmeh mbouj gaenj mbouj menh naengh henz daiz, gou caj mbouj gib hah dieg, cij caj song boux de haidaeuz byaujyenj lo. Cijraen bohmeh sien genj roek mbaw rongfaengx hung, dox- daeb baij ndei, gou lienzmuengz riengz guh, baih gwnz sam mbaw, baihlaj sam mbaw, youq gwnz gyaeujhoq baij ndei. Gizsaed, hix mbouj miz gijmaz hojguh ne, gou sim siengj. Ciep dwk, daxmeh daek gyang vanj haeux boek coq gwnz rong bae, lumj goengq bya iq ityiengh. Gou hix ciuq guh, lwgda mbouj yaep dwk cimyawj daxmeh, lauheiq swhgeij suek mbouj ndaej lumj daxmeh haenx.

Ginggvaq geij mbaek, caep haeux, gya duhheu, gya nohmou, youh caiq aeu haeux goemq ndei, liuxle couh dawz rong suek hwnjdaeuj. Gou siujsim lili dwk bungj hwnj mbaw rongfaengx, caenhliengh mbouj hawj haeuxnah loh ok- daeuj, hag gij yiengh daxmeh, dawz mbawrong suek hwnj- daeuj, hoeng, mbawrong lumj- baenz caeuq gou miz couz nei, cungj aeu caeuq gou doxdingj, baenzlawz hix suek mbouj ndaej hwnjdaeuj, haeuxnah doekbyagbyag roengzdaeuj, gou simgip muenghmuengh dax- meh, cij raen de riengjret dwk suek ndei song gyaeuj, haeuxnah couh lumj lwgnding dingqvah ityiengh ninz youq ndaw mbawrong mbonqngauz nei. Gou simgip lo, hojdedded dwk dawz mbawrong seizbienh suek, suek ndei gyaeuj gvaz le, gyaeuj swix haeux youh loh lo, gou youh gya mbaw rong haeujbae, youh vat di haeux okdaeuj, fan bae fan dauq, cungj suenq miz di yiengh faengx lo. Gou cuengq gaemz heiq seiz, daxmeh caeux couh aeu mae daeuj cug ndei baenz faengx lo. Gou gipmuengz aeu song sam diuz mae daeuj youq gwnz ndang faengx heux bae heux dauq, doeklaeng hot aen duq mbungqmbaj ndeu, aen faengx geizheih gou couh suek baenz lo. Gou baetbaet gen gyaengj gou, youh yawjyawj aen faengx daxmeh suek haenx, beij duh gou hung, caen ndeiyawj.

Gyanghaemh, daxmeh aeu faengx coq ndaw rek dumq cug lo, gij faengx daxmeh suek haenx gig lingzleih, hoeng aen faengx gou lujluj lajlaj suek baenz haenx, oen lij gaz gwnz, rong sanq hai lo, ndaw sim gou gig nanzsouh.

Seizneix, gou suek faengx gig sug lo. Hoeng, dang gou caiq suek faengx seiz, siengj hwnj aen faengx suek mbouj baenz haenx, de hawj gou mingzbeg: Guh saehcingz aeu naihhoz, mbouj ndaej simgip, cij guh ndaej saeh ndei. Baez daih’it suek faengx, dwg aen dangz youqgaenj ndaw ciuh vunz gou.

（lauxsae son’gyauq：Veiz Gyanghbingz/韦江萍）