Aenci ndonj haeuj ndaw ndoengfaexndoek dinbya de deuz lo.

Meh ha, gou cingq hohfuk meh go. Yienznaeuz, haxbaenh gou mbouj lumj beixmbauq yienghde naeuz: Meh bae ndaej bingzonj bw.

Hohfuk gou dwg faj fwj hausak ndeu. Meh ha, mwngz bae Haijnanzdauj gyae’gyanggyang de aeu yw, mwh daengngoenz ndatyanyan de, gij hohfuk gou couhdwg faj fwj hausak ndeu, mbin youq gwnzmbwn gyangbya, raemh coq meh, buhvaq meh couh mbouj deng hanh conh dumz liux lo, hoz meh cix mbouj baenz bitfiengj lo; gyanghaemh, genfwngz meh hix mbouj naet mbouj nanq lo.

Aenci ndonj gvaq ndaw ndoengfaexndoek dinbya de deuz bae gyae lo.

Meh ha, gou goj hohfuk meh go. Yienznaeuz, haxbaenh raemxda gou mbouj dingqvah, lae roengzdaeuj hawj meh doeknaiq lo.

Hohfuk gou dwg aenfaziq. Meh ha, meh bae Haijnanzdauj gyae’gyanggyang de aeu yw, youq gyangdoengh bungz gadah——lumj gadah laj ndoibya diegyw baihraeuz haenx——haengj roen, hohfuk gou dwg aenfaziq, do meh gvaq baihde dah bae. Meh couh mbouj hoj caij raemx gvaq dah lo, gavaq meh couh mbouj lau dumz lo; gyanghaemh, dabaeu gyaeujhoq meh couh mbouj baenz binghfungcaep seiz mbouj seiz in baenzneix lo.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）