Bitlwg youq hagdangz dwg boux daihvuengz lujlaj mizmingz ndeu, guhsaeh lujluj lajlaj, geiq gyaeuj lumz rieng, mbouj lumz sij cozyez, couh lumz daiq cozyez, ndigah, daihgya cungj heuh de daihvuengz lujlaj.

Miz baez ndeu gaujsi, duz bitlwg ndaw sim siengj：“Gou aeu ndeindei gaujsi, itdingh aeu gauj ndaej 100 faen, cingqmingz gou mbouj dwg boux daihvuengz lujlaj.” Bitlwg couh nyinhnyinh caencaen sij genj. Hoeng, sij sat le mbouj genjcaz, naengh youq gizhaenx gag gangj gag naeuz：“Gagaga, gou gauj ndaej ndei dangqmaz.” Mbouj liuh faensoq baez okdaeuj, bitlwg da daengx lo, 79 faen, yienzlaiz lij dwg rubrab nyex hux.

Lij miz baez ndeu, bitlwg ninz gvaiz, daengngoenz ciuq caekhaex lij caengz hwnq, nauhlingz yiengj lo, de mbat fanndang, youh gven nauhlingz lo, naeuz：“Ngoenzneix mbouj dwg ngoenzsinghgiz ma？Coi gijmaz coi?” De soh ninz daengz 9 diemj cij menhmenh hwnq. Aubit cingqngamj ginggvaq bangxhenz, couh cam：“Bitlwg, mwngz ngoenz neix vihmaz mbouj bae hagdangz?”“Ngoenzneix mbouj dwg ngoenzsinghgiz ha？”“Mwngz geiq loek lo, ngoenzneix dwg singhgizit.”Bitlwg baez dingq, vaiq buet bae hagdangz, hoeng bitlwg daeuj gvaiz lo. Yiengz lauxsae cam de vihmaz daeuj gvaiz, bitlwg najnyaenq, mbouj gamj guhsing.Yiengz lauxsae youh naeuz：“Dawz cozyez gyau daeuj.”Aiya, bitlwg lienz daehsaw cungj mbouj caengz aemq daeuj ne. Daengx ban doengzhag riuhaha. Seizneix bitlwg nyaenq dwk yaek ndonj haeuj congh lajnamh bae ndoj.

Mwngz yawj, bitlwg gig lujlaj, raeuz siuj baengzyoux mbouj ndaej rubrab lujlaj bw！

（lauxsae son’gyauq: Vangz Gveiyangh/黄桂香）