Sojmiz boux lwgsai cungj buek- mingh youz coh haenzdah lo, bouxboux loh caekhaex bin hwnj rinndumj, baenq gyaeuj doxdauq coh ndaw dah bae ra gij riz duz ngwzboengz.

Najraemx langhraemx fubfed, heusaw lumj nyawh, gyoengq lwgnyez manz sawqmwh lizhai ndaw dah bin hwnj haenz lo, hawj haxbaenh naj- raemx goenjcauz caemhcaiq langh- raemx luenh sinz sikhaek bienq ndaej gig caemrwg. Dou cingq vih ra mbouj raen gij rizdin duz ngwzboengz hung simgaenj raixcaix seiz, baihlaeng sawqmwh miz sing riuhaha hwnjdaeuj, lumj byajraez nei yiengj, dou cungj deng gij sing riu yinx gvaqdaeuj, naj Aulungzgveiz lumj donz ceijco ngamq mbehai nei, nyaeuq baenz dong, sing riu cingq daj ndaw bak hung de cienz okdaeuj.

“Ndei ha! Aulungzgveiz, mwngz gamj yaeuh dou!” Gou boux daih’it hemq hwnjdaeuj.

“Raeuz deng yaeuh lo!”

“Mbouj miz maz ngwzboengz, dwg Aulungzgveiz haep dou ndwi!”

Caezgya cungj hemq hwnjdaeuj lo, cungj doxcanj dauqcungz diuq roengz ndaw raemx bae moq.

Gou yawj Ah Cang youq ndaw dah haenqrengz dik raemx, lumj duzma bin nei youzraemx, siengj daengz haxbaenh de caeuq gou youq lajraemx doxciengj maknganx, youh gag hozndat hwnj- daeuj, hix mbouj miz maz yinxdaeuz caiq diuq roengz ndaw raemx, bin hwnj haenzdah, youq lajgofaex ra ndaej buhvaq gou, aeu song fwngz uet naedraemx gwnz ndang le, cacoemj daenj vaq, haed maenh saihwet, dawz buh dap youq gwnz mbaq, gvaengz gvaq aen ndoeng, yaek maranz lo.

Aulungzgveiz couh youq baihnaj gou mbouj gig gyae aijat byaij dwk, gou yaek gyaep hwnjbae ndaq de haxbaenh mbouj wnggai haep dou, yawj de byaij ndaej gig menh, gou yamq buet yamq byaij bae gyaep, hoeng gyaep le duenh roen hung, vanzlij gyaep mbouj ndaej de, cijndei cuengq menh yamqdin lo, byaij loh iq, dingj ndit ndat, menhmenh byaij maranz bae.

(caengz sat)