Gangj daengz Sawcuengh, ndaw- sim gou cungj miz gij faenh cingz aeu docih de. Aenvih gou cungj nyinh- naeuz Sawcuengh hawj gou ndaej baenz “bouxdangsaeh” he.

Sigij gonq 80 nienzdaih, mbanj gou hagdangz siujyoz couh son Sawcuengh lo. Seizde gou cingqngamj gyaepdawz aen seiz hag Sawcuengh, gangj daeuj ban gou wnggai dwg aen yienh dou gij lwgnyez hag Sawcuengh “daih daih’it” lo. Seizhaenx, laj mbanj cawz miz cunhvanzsiuj, gij siujdui liz cunhvanzsiuj gyae lij miz diemjson’gyauq dem bw, lwgnyez youq diemjson’gyauq doeg sat it、ngeih nienzgaep le couh bae cunh- vanzsiuj laebdaeb doegsaw. Seizhaenx, gou youq diemjson’gyauq doeg it、 ngeih nienzgaep le, yaek bae cunh- vanzsiuj doegsaw seiz, lauxsae cij ndaej yungh sujgyaj son dou hag Sawcuengh.

Ngamq hag Sawcuengh seiz, gou cungj roxnyinh gig singjsien caemh- caiq dawzyinx raixcaix, hix yungzheih hag rox, hag ndaej meihmwdmwd, roxnyinh beij hag Sawgun yungzheih lai lo. Hoeng, seizhaenx Sawcuengh youq ndawbiengz cix mbouj ndaej daengz vunzlai yawj hwnj da, nyinh- naeuz rox Vahgun ndaej byaij doh daengx guek, gangj Vahcuengh bae mbouj ndaej gyae, hag Sawcuengh sai seizgan ndwi, ndigah haujlai vunz- mbanj cungj soengq lwg bae aen hagdangz mbanjnden lo.

Hainduj daxboh gou hix lumj bohranz bouxwnq baenzneix naemj, mbouj nyienh gou hag Sawcuengh, hix yaek heuh gou bae hagdangz mbanj- nden doegsaw. Geiq ndaej ngoenz he, daxboh heuh gou daengz henz ndang de, nyinhcaen cam gou gyaez hag Sawcuengh lwi, gou mbouj ngeix maz couh gangj gyaez, lij naeuz Sawcuengh mboujdan yungzheih hag, caemhcaiq mbouj yungh gyau cienz- hag, lij soengq hawj hagseng gonjbik caeuq bonjcozyez bw. Daxboh raen gou baenzneix gangj le, roxnyinh gou gangj ndaej deng, hix roxnyinh hag Sawcuengh ndaej gemjmbaeu aen rap ndaw ranz, couh mbouj caiq dwen soengq gou bae mbanjnden doegsaw lo.

Gou couh yienghneix caeuq Sawcuengh giet roengz yienzfaenh mbek mbouj ndaej lo. Aenvih gou beij gij doengzhag wnq daj song bi gonq hag Sawgun, Sawgun giekdaej gig ndei, rox aeu Vahcuengh gej cih Sawgun, aeu Cuengh Gun song sawvah doxgeiq doxgej, caemhcaiq swhgeij roengzrengz hag, cingzcik cungj baiz youq baihnaj. Bi 1988 nienz ndaej daengz aen hagdangz yienhsingz minzcuz cunghyoz doeg cuhcungh lo.

Youq cuhcungh, gou engqgya roengzrengz bae doegsaw, mboujdan roengzrengz hag ndei Sawgun, hix mbouj lumz bae hag Sawcuengh, mizseiz lij aeu Sawcuengh bae geiq danhswz Yinghyij. Aenvih gou gag roxnyinh hag Sawcuengh yunghcawq gig hung, hix gyaez hag de. Gij cingzcik gou hix haemq ndei, baiz youq ndaw ban it ngeih mingz. Bi 1991 gou gauj ndaej Gvangjsih Sawcuengh Yozyau.

Gvangjsih Sawcuengh Yozyau dwg Swcigih giz cungdenj cungh- dwngj conhyez yozyau, youq seiz- haenx, gauj ndaej cunghconh bizyez le couhdwg boux yaek ndaej “gwn haeux guekgya” lo. Seizhaenx, gou mbouj- dan dwg ndaw ban gij hagseng yinggai ndawde boux dog gauj ndaej hwnj, lij dwg aen mbanj gou boux daih’it gauj ndaej hwnj cunghconh, youq seizde dwg gienh saeh gig miznaj ndeu, cienz doh daengx mbanj, vunzmbanj cungj haenhnaeuz bohmeh gou ciengx gou son gou baenzcaiz lo.

Youq Gvangjsih Sawcuengh Yozyau doeg cunghconh 4 bi bizyez le, bi 1995 nienz, gou faenboiq youq yangh cwngfuj guhhong, baenz boux caencingq“gwn haeux guekgya” ndeu. Daengz seizneix, gou youq gihgvanh danhvei guhhong miz 24 bi lo. 20 lai bi daeuj, youq laj dangjcujciz beiz- yangj, gij hong gou daj yanghcin daengz yienhsingz, cizvu daj boux- bansaeh hwnj daengz fuyanghcangj、fugizcangj…… Boux daeglwg vunz- guhnaz ndaej bienqbaenz boux- dangsaeh, caencingq dwg gij mingh ndaej gaijbienq lo. Yienznaeuz bizyez le, gij hong gou guh caiq hix mbouj gvendaengz Sawcuengh saekdi, hoeng gou lij miz gij sibgvanq roengzban ndaejhoengq le yawj saw Sawcuengh sij Sawcuengh.

Bineix, cujsiz diuh gou daengz aen bumwnz gvendaengz Sawcuengh, caen dwg liuh mbouj daengz. Byawz rox, baebae dauqdauq 20 geij bi, couh lumj veh aen gien nei, gou youh dauqcungz ndaej caeuq Sawcuengh yien fwngz doxbyaij roengzbae.

Docih Sawcuengh, de hawj gou yied bienq yied ndei.