Gou dwg duj fwj angqfaengz ndeu, ngoenzngoenz cungj youq gwnzmbwn caih bae caih youq. Gou mizseiz daenj buhvaq hau, mizseiz daenj buhvaq ndaem; mizseiz mbaeu lumj ceijsa, mizseiz naek lumj goengqbya. Vunzlai cungj gyaez caeuq gou guhcaemz. Mizseiz gyoengq roeg iq daeuj caeuq gou gangj vahseb; mizseiz daxbuz rumz ciengq go ndeidingq hawj gou dingq; mizseiz daxdoeng daengngoenz caeuq gou guh goemqndoj; mizseiz dahcej ronghndwen gangj gojgaeq hawj gou dingq.

Langh miz heiqswi hwnj daengz gyang mbwn le comz guhdoih, liuxle menhmenh hwnjbae daengz gyang mbwn ne couh miz gou lo, ndigah ndaw ndang gou miz haujlai raemxfwi. Miz mbat ndeu, gou cingq youq gyang mbwn ciengq go, yawjraen gwnz namh miz geij go nywj iq ngaem gyaeuj youq, gou raen geizheih lai couh cam gyoengq go’nywj iq：“Sou vihmaz naiq baenzneix ne?”Gyoengq nywj iq de menmenh ngiengx gyaeuj hwnjdaeuj, yawj le yawj gou, youh ngauz gyaeuj doiq gou naeuz：“Dou gizneix geij aen singgeiz mbouj doek fwn nauq, gij raemx ndaw ndang dou deng haw bae caez.”Gou ngeix yaep ndeu, uk baez cienq le, couh siuqrumz, dangseiz daxbuz rumz couh daeuj lo, de sup heiq gaeuq bae, laep da, haenqrengz boq, neix ndang gou yied daeuj died hung, yied daeuj yied naek.“Hunglunglung、hunglunglung……”Daxgoeng byajraez hix daeuj coengh gou. Dangseiz, gou couh bienqbaenz haujlai caek raemx iq, gyoengqde doq ciengq gij go ndeidingq dangqmaz, doq doek roengz gwnz namh bae, go’nywj iq couh ngiengx gyaeuj hwnjdaeuj, dujva naj riu lo, dah’iq buet bae lai angq lo……

Gou mboujdan gyaez coengh bouxwnq, vanzlij maij cang yienghsiengq ndei! Youq doengh ngoenz ndit rongh rumz ndei, gou daenj buhvaq hausak, cang mbwnheu ndeiyawj dangqmaz; daengz mbwn yaek muemj le, gou couh daenj gij buhvaq raiz haj saek haenx, dawz mbwn cang baenz lai saek lai yiengh. Vanzlij gou hix rox gij fap Sunhvuzgungh caetcib ngeih bienq, mizseiz bienqbaenz duzdouq hau iq dwggyaez ndeu；mizseiz bienqbaenz duz- yiengz caih youq caih bae ndeu; mizseiz bienqbaenz duzlungz ak maengh ndeu……

Neix couhdwg gou, fwj caih youq caih bae, fwj cang mbwn gyaeundei.

（Yenz Swjhanz）