Sam nyied sam dwg ngoenzciet Bouxcuengh raeuz. Bineix sam nyied sam, hagdangz dou ciuqgaeuq guh gij hozdung minzcuz vwnzva haeuj hagdangz haenx, dou angq dwk ciengq diuz go《Gyaez Cunghvaz Raeuz》：“Hajcib roek yup ndaundeiq, hajcib roek duj va, hajcib roek minzcuz beixnuengx caemh aen gya, hajcib roek cungj vahgangj gyoebcomz baenz coenz vah ndeu, gyaez Cunghvaz raeuz, gyaez Cunghvaz raeuz……”

Banhcujyin Cangh Gez lauxsae, lij miz Luz Cwngz lauxsae、Cangh Siujcungh lauxsae hix daeuj caeuq dou caez ciengq, bouxboux angq raixcaix. Cangh Gez lauxsae daj Gveicouh daeuj, dwg Bouxyaej, Luz Cwngz lauxsae daj Yinznanz daeuj, dwg boux Yizcuz, Cangh Siujcungh lauxsae daj Gyanghsih daeuj, dwg Bouxgun. Geij boux lauxsae caeuq dou gyoengq hagseng Bouxcuengh bonjdieg neix doq ciengq doq humx baenz aen gien ndeu, aen gien minzcuz daih doxgiet ndeu.

Gou cam Cangh lauxsae, mwngz vihmaz daj giz gyae baenznyaenx daeuj Nazheuj dou ha?” “Aenvih raeuz dwg ranz vunz ndeu.” Geij boux lauxsae mbouj doengz minzcuz neix daj diegrog daeuj daengz Guengjsae, daeuj daengz Namzningz, daeuj daengz aen hagdangz Nazheuj dou. Gyoengqde vihliux son saw, vihliux son cienz gij gamjcingz minzcuz doxhuz, caenndang bae coicaenh minzcuz doxgiet.

Cangh lauxsae naeuz, gyoengqde Bouxyaej Gveicouh caeuq Bouxcuengh Guengjsae caemh dwg daihlwglan Bouxvet ciuhgonq baihnamz guek raeuz, song aen minzcuz gig doxlumj. Bouxyaej gvaq sam nyied sam, haengj guh haeuxnaengj haj saek daeuj baiqcoj sauqmoh, gamjaen diendeih、gamjaen cojcoeng、gamjaen gwnz- biengz.

Luz Cwngz lauxsae lwnh dou nyi, ngoenz “ciet bogfeiz” Yizcuz loeg nyied ngeihseiq ceiq hoengh, ranzranz gaj yiengz gaj gaeq, cawj megsamgak moq. Aeu nohyiengz nem ngaizmeg doxgyaux le dawz bae vanq coh seiq- lengq, gouz mbwn baujhoh loegcuk baenz ndei, fouz cai fouz haih. Daengx mbanj vunz comz youq ranz bouxgeq baiqcoj, eu fwen diuq foux. Doek- laeng, gak ranz dawz bogfeiz dauqranz guh “gyaep fangz siu cai”.

Gou gyaez gij fungsug gak minzcuz, guek raeuz miz minzcuz lai, gij vwnzva gak minzcuz gyoebbaenz vwnzva guek raeuz. “Va dog mbouj baenz cin, seizcin va rim doengh.” Dou dwg lwglan Bouxcuengh, wnggai rox bae swnjcienz gij vwnzva Boux- cuengh maenhndei raeuz.

Raeuz dwg youq ndaw ranzhung Cunghvaz minzcuz, wngdang henhoh minzcuz doxgiet. Luz lauxsae、Cungh lauxsae gaenq guh ndaej aen yiengh ndei hawj raeuz, caih mwngz vunz dieg lawz, vunz minzcuz lawz, cungj dwg gaenx guhhong, laeglemx okrengz bae henhoh Cunghvaz Minzcuz daih dox- giet. Dou hix yaek hag yiengh gyoengqde. “Lwgnyez ak guek cix ak”, dou yaek daj mwh lwgnyez guh hwnj, gyaez minzcuz raeuz, bae henhoh caeuq hawj Cunghvaz minzcuz doxgiet engq ndei, hawj aen minzcuz raeuz ndaej hwngvuengh hwnjdaeuj, ciengx- lwenx ndwn maenh youq dangqnaj gak minzcuz lajbiengz！ 

（lauxsae son’gyauq：Cungh Hihcwngh/钟希增）