Haeuj Mbanjyauz

Vunzlai Yauzcuz Gyo Dangjaen

Ndwen 11 ngoenz 13 banhaemh, ndaej daengz Lingzyinz Yenveij Dungj- canbu sonyinx, ciengz “Ranzyauz Yeyau” minzcuz vunz daegbied noix Cauzlij Yauzcuz Yangh mbouj dox- doengz ndeu bae daengz Bingzdangz Cunh Mbanjgiujbungz guh. 20:30 “Ranzyauz Yeyau” cingqsik hainduj gangj, vunzmbanj saimbwk lauxnyez doxcomz youq giz ndeu, ganbu capyouq mbanj caeuq ganbu cunh “song veij” aeu gij caizliuh yaek gangj haenx dawz okdaeuj, gangj gij gangjvah youqgaenj Siz Ginbingz cungjsuhgi caeuq gij cingsaenz Cibgouj Daih Dangj、gij saehsaed senhconz Vangz Vwnzsiu、vut gungz gunggeng、lajmbanj saenqhwng daengj cwngcwz hawj vunzmbanj. Boux- senhconz yaep ndeu gangj Vahbuj- dungh, yaep ndeu gangj Vahcuengh, yaep ndeu gangj Vahyauz, vunzmbanj dingq ndaej yinx dangqmaz.

“Yungh Vahbujdungh gangj cwng- cwz gonq, yienzhaeuh yungh Vahcuengh roxnaeuz Vahyauz gangjgej cwngcwz hawj vunzmbanj, yienghneix hawj vunzmbanj rox ngaih lai.” Yangh dangj- veij suhgi Mungz Gangh gaisau naeuz, daengx yangh 20 lai aen Mbanjyauz minzcuz vunz daegbied noix, bouxgangj yangh、cunh song gaep binaengz cungj aeu daengz mbanj gangj baez ndeu song baez doxhwnj. Lingzyinz Yen minzcuz daegbied noix “Ranzyauz Yeyau” bi 2017 cingqsik hainduj, seizneix boux- gangj mboujdan yungh Vahbujdungh Vahgun gangj cwngcwz ndaej, youh yungh Vahcuengh gangjgej cwngcwz ndaej haenx, moix aen yanghcin cungj miz.

Linghvaih, aenci riuzdoengh daeuj gangj hix dwg gij daegsaek Lingzyinz Yen senhconz hagsib gij gangjvah youqgaenj Siz Ginbingz cungjsuhgi caeuq gij cingsaenz Cibgouj Daih Dangj、gij saehsaed senhconz Vangz Vwnzsiu、vut gungz gunggeng、lajmbanj saenqhwng daengj cwngcwz, aen yienh neix lij cienmonz boiq ci, gwnz ci bwh miz gij caizliuh senhconz yungh Vahgun、Vahcuengh、Vahyauz loegyaem ndei haenx, guekgya banggungz cwngcwz, yivu gyauyuz cwngcwz、 yihliuz veiswngh cwngcwz daengj cungj miz, aeu cwngcwz cienz daengz gak vunz gak mbanj bae.

(Vangz Yenzyungz/黄元荣)