Bonjbauq siusik (gicej Cau Dwzfeih) Ndwen 11 ngoenz 16, Gaiq Daihngeih Daengx Gih Siujhagseng Yienhciengz Sawcuengh Cozvwnz Doxdax youq Nanzningz banh, hozdung dwg Swcigih Gyauyuzdingh cawjbanh, Nanzningz Swhfan Dayoz ciepbanh. 80 boux siujhagseng 28 aen yienh(si、gih) daengx gih camgya baez doxdax neix.

Baez doxdax neix boux camgya doxdax cungj dwg doenggvaq aenban、hagdangz、yozbengih、yienh si gih baenz caengz baenz caengz senjleh, doeklaeng doigawj camgya daengx gih doxdax. Doxdax faen A、B song cuj, A cuj dwg sam、seiq nienzgaep, B cuj dwg haj、roek nienzgaep, hagseng ciuq gij daezmoeg dangciengz aeu hawj haenx raiz faenzcieng.

Doxdax yienhciengz, gyoengq boux camgya doxdax cingsaenz gvaekgvaek, saenqsim cibcuk, yungh Sawcuengh raiz gij gojgaeq hawj vunz yinx, aeu gij raen gij naemj bonjfaenh raiz ok- daeuj, doenggvaq faenzcieng gangjok gij siengjfap daegbied lai yiengh bonjfaenh.

Youq mwh aen yizsi gietsat, Swcigih Gyauyuzdingh Minzcuz Gyau- yuzcu fucucangj Lij Gvangjhaij gangj- vah. De naeuz, baez doxdax neix muzdiz dwg daezsang gij naengzlig gangj caeuq yungh Sawcuengh Vahcuengh hagseng, gungganq gij yinxdaeuz hagseng hag Sawcuengh, fungfouq gij ndwenngoenz vwnzva ndawhag aen hagdangz Cuengh Gun song sawvah, gunghawj aen daiz- heiq ndeu hawj hagseng Bouxcuengh langhbaij bonjfaenh. Doengzseiz, doeng- gvaq doxdax, dajcauh gij vunqsik moq sonhag gyauyenz Cuengh Gun song sawvah yungh “beij” coi “maeq”, yungh “maeq” coi “son”, “beij、maeq、son” dox giethab haenx, cauh’ok gij heiq- faenh ndei sonhag gyauyenz Cuengh Gun song sawvah, coicaenh Cuengh Gun song sawvah sonhag laebdaeb haiguh.

Youq mwh aen yizsi gietsat, Gvangjsih Minzcuz Bause cungjbenhciz、hoizsaemj Yangz Lanzgvei daiqbiuj bingzveij guh diemjbingz. Gyoengq bingzveij nyinhnaeuz, gyoengq boux camgya doxdax, saw raiz ndaej deng, mbawgienj seuqcingh, faenzcieng dingzlai hagseng soq cihsaw cungj gaeuq lo, yawj ndaej ok aen hagdangz miz boux camgya doxdax haenx yawjnaek baez doxdax neix dangqmaz, gaenxmaenx cujciz hagseng camgya doxdax caemhcaiq youq mwh doxdax doekgonq son dem. Baez doxdax neix miz haujlai faenzcieng ndei, daj faenzcieng yawj rox gij giekdaej Sawcuengh hagseng ndei, raiz faenz- cieng miz lohnaemj, aen cungsim faenzcieng yienhda, miz cingz miz noh, cungfaen langhbaij le gij cingzcik ndei Cuengh Gun song sawvah sonhag.

Gaiq Daihngeih Daengx Gih Siujhagseng Dangciengz Yungh

Sawcuengh Raiz Faenzcieng Doxdax Youq Nanzningz Banh