Mwngz guhlawz cungj mbouj lae daengz gwnz ndoibya bae ne? Gadah’iq sawdikdik neix ha!

Yawj aen loekraemx henz dah de vei, daek raemx coq gohaeux ndaw naz gwnz ndoibya baenzngoenz bae, dwgrengz lai lo, hojguh lai lo.

Vihmaz mwngz cungj dwg daj lajbya lae gvaqbae ne? Ga dah’iq sawdikdik ha, dwg bouxlawz gvidingh mwngz baenzneix guh ne?

Dah’iq ha, langhnaeuz gou dwg mwngz, gou couh mbouj ciuq gij gvidingh neix guh bw!

Gou aeu lae hwnj daengz gwnz ndoibya bae dahraix, gag lae bae ndaw naz ndaem gohaeux de bae.

Gizlawz aeu gou, gou couh lae bae daengz gizde, couhsuenq bya sang roen lingq, gou goj lae bae daengz gizde bae!

Gou aeu lae bae daengz gwnz ndoibya bae dahraix, lae daeuj daengz henz ranz gou. Yienghneix, bohmeh haeujhaemh guhhong dauq ranz le, couh mbouj hoj bae daengz laj bya rap raemx lo, mbouj hoj rap song doengj raemx naekgywdgywd byaij ga roeniq lingqlaulau raeuzradrad de lo.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）