Miz aen daemz iq ndeu, ndawde miz haujlai duzgoep, gyoengqde yienghsiengq doxlumj caez bae, mbouj rox byawz dwg byawz, danhseih gyoengde guhdoih youq huzndei dangqmaz.

Miz ngoenz ndeu, miz ndaekvuengz guekduzgoep ndeu daeuj gizneix cunz- yawj. Gyoengq goep gizneix caez daeuj baiz youq ndei, angqcoux ndaekvuengz daeuj neix. Ndaekvuengz duzgoep daengz lo, de gwnz gyaeuj daenj coq aen mauh- vuengz henjgim henjgim ndeu. Ndaek- vuengz neix ngiengx gyaeuj hwnj mbwn bae, ndaenggon dangqmaz le yawj gyoengq goep ndaw daemz neix, naeuz：“Sou gag yawj gyoengq sou, yienghsiengq sou‘yaez’lai, baezlawz mbouj cang yiengh ndeiyawj di ne?”

Miz duzgoep iq ndeu cam duzgoep geq：“Gij maz heuhguh‘yaez’ne?”

Duzgoep geq han naeuz：“Ndaek vuengz neix dwg naeuz raeuz yiengh yaez lai、mbouj ndeiyawj.”

Duzgoep iq yawj ndaekvuengz baez ndeu, liuxle lejsing naeuz：“Ndaek- vuengz neix yiengh caeuq raeuz doxlumj, couh lai daenj aen mauhvuengz ndeu ndwi bw!”

Seizneix miz raq rumz ndeu ci gvaqdaeuj, ci aen mauhvuengz de doek bae, aen mauhvuengz de doek le ringx haeuj ndaw mieng bae. Gyoengq goep mbouj haeujsim yawj gijneix. Gvaq yaep ndeu, gyoengqde yawj mbouj raen ndaekvuengz lo, cungj simvueng dangqmaz.

Seizneix, gyoengq goep ndawde miz duzgoep ndeu naj coh daihgya hemq naeuz：“Gou dwg bouxvuengz, gou dwg bouxvuengz.”

Gyoengq goep cungj riu de：“Mwngz suenq gijmaz bouxvuengz?”

Duzgoep haenx youh hemq naeuz：“Gou couhdwg bouxvuengz, gou couhdwg bouxvuengz!”

Gyoengq goep doengzcaez riu naeuz：“Sou yawj la, duzgoep neix baenzbingh lo.”

Neix liuxle, gyoengq goep couh doengzcaez doq riu doq bae gaeb non, dandan lij lw ndaekvuengz mbouj daiq mauhvuengz haenx youq gizhaenx haenqrengz hemq bae hemq dauq……

（Gyaz Swjyenh）