Yienznaeuz gou ngamq ndaej 12 bi, hoeng gou rox hai vaizdiet iq cae naz lo.

Youq duenh sujgyaj ngoenz ndeu haetromh, gou vanzlij fangzhwnz loq, sawqmwh deng geij sing heuh cauj ndiu lo. Ya! Dwg daxgoeng cingq heuh gou! Gou sikhaek hwnqdaeuj cung roengz laj laeuz bae raen daxgoeng. Hoeng ra bae ra dauq cungj mbouj raen daxgoeng, gou laihnaeuz de gaenq roengz naz bae guhhong lo. Seizhaenx, baihrog dou yiengj hwnj sing: “Doed doed ……”, dwg sing vaiz- diet iq cae naz. O, daxgoeng caeux couh youq baihrog caj gou ne.

Gou cam daxgoeng:“Mwngz yaek bae cae naz ma?”Daxgoeng naeuz:“Dwg ha. Mwngz riengz gou bae lwi”Aen gihvei ndei dangqmaz neix gou gaej lauqgvaq. “Gou bae! Gou bae!” Gou ganjvaiq dwk han naeuz.“Mwngz rox hai vaizdiet iq ma?” Daxgoeng cam dwk.“Gou sawqsawq yawj ba.”Gou benz hwnj dieg naengh vaizdiet iq bae, song fwngz gaem maenh bajsouj, gou roxnyinh aen gyaeujci caizyouzgih saenqdaeddaed, saenq baenz fwmgz gou ca di gaem mbouj maenh bajsouj lo. Daxgoeng lwnh gou baenzlawz ngomx, gya youzmwnz, gvadangj. Gou ciuq vah daxgoeng bae sawq lo, gya le di youz- mwnz. Fazdunggih“doed deed doed” sing gya vaiq haujlai. Hoeng vaizdiet iq mbouj byaij saek yamq, dwg mbouj dwg gou loengh gihgi vaih gvaq lo. Gou gig simvueng, sikhaek diuq roengz ci daeuj. Daxgoeng raen le riu dwk naeuz:“Mwngz gvadangj gvaq la?” Gou fwt singj gvaqdaeuj. Youh caiq hwnj ci，gvadangj, menhmenh cuengq lizhoz roengz, aen gih cae naz vaizdiet iq menhmenh dwk byaij hwnjdaeuj lo……

Gou hai aen vaizdiet iq bae coh ndaw naz. daxgoeng itloh riengz gou byaij, sing hung gangjvah vix gou, itmienh vad fwngz son gou. Gou ciuq vah daxgoeng bae guh, siujsim dangqmaz menhmenh hai baenaj. Vaizdiet iq hai daengz gyaeujnaz lo, aen caekhaex iq gou hix deng saenq baenz cungj mazmwd lo. Gou dingz le vaizdiet iq，hawj daxgoeng dawz vaizdiet iq hai roengz ndaw naz bae, gou hix riengz de roengz naz bae.

Daxgoeng dawz vaizdiet iq hai daengz ndaw naz le, roengzdaeuj, heuh gou hwnjbae, couhdwg heuh gou cae naz. Gou dangseiz ngaez yaep ndeu, hoeng lijdwg ciepsouh lo. Gou hwnj gwnz vazdiet iq bae, song fwngz gaem maenh bajsouj, aenvih dwg youq ndaw naz unqnemnem byaij, caeuq youq gwnz diegbingz byaij mbouj doxdoengz, loengh mbouj ndei gou couh deng lienz vunz caeuq “vaiz” laemx roengz ndaw naz couh yakyawj lo. Gou dawz dangjvih diuh daengz sam dangj. Vaizdiet iq haidoengh lo, gou ndaej siujsim hai de, byaij soh, ngeu, vuenh dangj, menhmenh dwk, gou hai ndaej yied daeuj yied swnhfwngz lo. Couh yienghneix, gou hai vaizdiet iq youq ndaw naz baebae dauqdauq, buenq aen cungdaeuz couh cae ndaej gaiq naz ndeu lo, daxgoeng daengj lwgfwngzmeh coh gou, gou riu ndaej bak mbouj haep. Duenh banhaet, gou laebdaeb cae liux sam gaiq naz, song gen gou cungj youh naet youh in liux, caekhaex hix maz caez lo, hoeng youq ndaw naz cienq bae cienq dauq, gou roxnyinh swhgeij lumj boux yinghyungz ndeu.

（lauxsae son’gyauq：Vangz Gveiyangh/黄桂香）