Ngoenz singgeizit rumz ndei mbwn gvengq. Lauxsae byaij haeuj gyausiz naeuz：“Gyoengq doengzhag, yozyau raeuz ngoenzcog cujciz bae gunghyenz youz, cingj daihgya baema ranz bwh ndei.”“Yo!”Ndaw gyausiz couh yiengj sing’angq singhemq goksasa.

Ma ranz le, gou bwh ndei baenz doi doxgaiq bae：Gojloz, gepmaenz, gyauj- gwzliz, gojdung……cungj dwg bwh ce ngoenzlaeng lijyouz, gou angqyangz raix- caix.

Ngoenzdaihngeih, gou caeux couh ndiu lo, aemq hwnj doxgaiq ndeigwn haenx, angqvauvau bae hagdangz. Daeuj daengz hagdangz le, va, gyoengq doengz- hag daiq daeuj gij ndeigwn caen lai ha! Gak cungj gak yiengh, miz rang miz manh, geq mbouj rox liux. Gou siengj, baez neix ndaej gwn gaeuq bae lo.

Dou hwnj le cicunghbah, lauxsae diemj soqvunz, gangj le ancienz gveihcwz caeuq hozdung gonqlaeng, liuxle couh hwnjdin lo.

Dou daeuj daengz gunghyenz, sien bae aen daemzbyagim gueng bya, baenz duz baenz duz byagim haenx, daenj“ndangdaenj”ronghsien, hoengz, henj, hau, ndaem, heu, gak cungj gak yiengh. Cuengq liuh roengzbae, gyoengqde dox- canj gwn, fat ok sing sisi soso, sinz hwnj baenz duj baenz duj varaemx, ndit ciuq gyaetbya myigmyagmyag. Raen byagim gwn ndaej baenzneix rang, gou hix ndwnj myaiz lo.

Dou youh bae suenva yawj va. Gizneix va gig lai, gak cungj gak yiengh, lai dangqmaz bae, saek mbouj dox- doengz, homfwtfwt, hawj vunz yawj le sim’angq dangqmaz, haujlai bouxyouz ingjsiengq louzniemh.

Banringz seizgan daengz lo, gyoengq doengzhag baenz gyoengq baenz bang naengh youq laj faex, gwn doxgaiq diemzsubsub. Gou gwn ndaej gig diemz, raen habhoz raixcaix.

Yaek baema ranz lo, ingj siengq ba,“gahcah!”dou youq ndaw gunghyenz ce gij ndangngaeuz dou angqyangz haenx, dawz gij simcingz gyaeundei dauqbae. Maqmuengh baezlaeng dauqdaeuj moq.

（lauxsae son’gyauq： Mungz Cwngzgen/蒙成建）