De dwg bouxbangfuz ranz gou, de vunz gyaeu、simsoh youh ndeigangj, mingzcoh de heuhguh Mwz ahyiz.

Geiq ndaej de mbat daih’it daeuj ranz gou, gou yawj de cungj ngaez lo: Cij raen de byoem youh raez youh ndaem, fouq lwgda luenzlulu lumj naedcaw, baez riu hwnjdaeuj gwnz naj loh’ok song aen cenj, giuzndaeng de youh hung youh sang, gyaeu raixcaix. Seizhaenx gou ndawsim gag ngeix, de baenzneix gyaeu, ranz gou youh yienghneix gungz, de yawj ndaej hwnj ranz gou lwi? Hoeng gij ngeixfap gou loek lo.

Baez haenx, ndaw fuzbinzban heuh dou daiq daxmeh gou bae yienhsingz Aisinh Ganghfuz Yihyen genjcaz aeu caizliu banh yozcicwng. Gou caeuq daxboh cingq lauheiq mbouj rox baenzlawz daiq daxmeh gou bae naenghci, couh youq ngoenz haenx haetcaeux, Mwz ahyiz couh bau aen ci ndeu heuh vunz daeuj ranz gou ciep dou, de hix daj danhvei de ganj bae yihyen. Daengz yihyen seiz cijraen vunzlai lumj gwnz haw, seizneix dou ra mbouj raen Mwz ahyiz, ndawsim cingq gip dwk lumj duzmoed youq ndaw rekndat. Cingq youq seizneix bouxbangfuz Mwz ahyi couh daengz henz dou lo, de heuh dou naengh youq henz ci, de bae bang dou banh, hoeng, daxmeh gou cij daiq miz mbaw siengq conq ndeu, mbouj dwg song conq, Mwz ahyi youh gipmuengz bang daxmeh gou ingj siengq, yienzhaeuh song din lumj dawz feiz nei dawz bae bang yaenq. Cib faen、ngeihcib faen……Seizgan lumj laeuhsa menhmenh laeuh okbae, cigdaengz gvaq buenq aen cungdaeuz le, dauqndaej raen Mwz ahyiz gaenjgip byaij daeuj coh dou. Seizneix, daengngoenz haenq lumj feiz, cij raen de mienh uet hanh mienh lumj buet nei byaij daeuj coh dou. Daengz gyawj le, raen gwnz fwngz de lij riuj miz daeh lwgmak he, daengz henz ndang gou, de couh ndenq hawj dou gwn. Seizneix dou dungx cingq iekngaungau, de caen lumj boux mbwn doek siet seiz hawj vunz soengq danq ha! Gou yawj ndang saeq de baiz youq aen doih raezrangrang haenx, ndawsim gangj mbouj ndaej ok gijmaz feihdauh, gvaq le haujlai nanz, dauqndaej banh ndaej lo.

Dou naeuz aeu dauqma seiz, Mwz ahyiz youh daj aendaehbeq de dawz song bak maenz ngaenz mienh ndenq hawj gou mienh gangj：“Siuj baengz- youx mwngz aeu ciuqgoq ndei daxmeh mwngz, aeu nyinhcaen doegsaw, gij ngaenz neix dwg hawj mwngz doegsaw yungh……”Gou lienzmuengz vad fwngz gangj:“Mbouj yungh、mbouj yungh, docih mwngz.”Hoeng de nyengh dawz ngaenz oet hawj gou, seizhaenx gou raemxda doek lo, lwgda mbouj gamj yawj de, gou lau langh yawj de le gou couh daej ok sing daeuj.

Gou gig docih bouxbangfuz Mwz ahyiz, caj gou majhung le, hix lumj de ityiengh bae bangcoengh bouxwnq .

（lauxsae son’gyauq：Lungz Gingyi/龙庆煜）