Baezbaez gou aeu namhboengz nyaenj baenz lailai aen bingjluenziq, baezbaez gou aeu lailai naed ngveihmaknganx ndaem youq diegbingz baihnaj ranz, beixmbauq ha, mwngz vihmaz cungj baksoem naeuz gou “namhboengz rim fwngz, gyuek lai, dwgcaengz lai” ne?

Daxau youq ndaw yiuzvax laj bya doiqnaj de, ngoenzngoenz aeu namhboengz fad baenz lailai ndaek cien daeuj caep ranz, guh baenz lailai gep vax daeuj goemq ranz, fwngz gyoengqde goj nem rim namhboengz. Gyoengq daxau goj gyuek lai, dwgcaengz lai ma, beixmbauq ha?

Bohmeh ngoenzngoenz bae gwnz bya ndaem yw, song fwngz ciengzseiz gyuek namhboengz. Mwngz goj haemz bohmeh, naeuz bohmeh gyuek ma, beixmbauq ha?

Gij mbu youh van youh byot de, gij lwgcid baenzgwn dahraix de, cungj dwg ndaem youq ndaw namhboengz. Mwngz goj raen mbu caeuq lwgcid youh gyuek youh dwgcaengz ma, beixmbauq ha?

Mwngz langhgyaj youq ranz seizde, bae coengh bohlungz vat lwgheuj, buhvaq mwngz caeuq gwnz naj mwngz cungj gyuek namhboengz liux. Nyaenx gou cix guhlawz naeuz mwngz ne?Beixmbauq ha!

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）