Daih’it Laj Gofaexnganx

Mwh gou yaek gyaep hwnj Ah Veij seiz, dingqnyi dahnuengx baez hemq. Gou baez baenq gyaeuj, couh mbouj raen de lo, de gaenq deng ndoengfaexnganx mwncupcup gwnz bya goemq caez lo. Danghnaeuz liuh ndaej daengz, gou couh mbouj daiq de daeuj lo, hoeng, gou lau daxmeh yaek hozndat.

Gou daengx din roengzdaeuj, daengx ndang hanh conhdwgdwg, caj diemcaw ndaej gaemz heiq ndeu le, cij sing hung heuh de:“Ah Yingh? Ah Yingh?”

Gij sing iqet caemhcaiq hojlienz he han gou:“Gobyauh!”

“Mwngz deng sieng lwi?”

“W, mwngz vaiq daeuj.”

“Deng gyawz le?”

“Deng giz ga gou lo.”

Gou ngeix, itdingh dwg de buet baeg le couh laihdai, gou vanzlij laebdaeb buet baenaj. Hoeng saek- laeuq de caen deng sieng, baenzlawz guh?

Vunz gizyawz youq gyawz ne?

Gou raen gij riz gyoengqde youq ndaw ndoeng faexmaknganx byaij. Gyoengqde lumj gij faenz rauq nei cigsoh menhmenh bin coh dingjbya, gij go’nywj baihlaeng gyoengqde cungj deng daemh laemx roengzdaeuj. Aenvih bineix seizcin seizhah fwn noix, daengz ndawcib ndwen gouj, doenghgij doenghgo beij doenghbaez cungj maj ndaej daemq, caenh raen benq mbawfaex deihdwddwd boep roengz, cingq caj fwn doek.

Doenghgij bo daemqdet haenx, heiqndat lumj langhhaij henjgim nei, itloh foekfan coh gwnz mbwn. Heiqndat ndonj haeuj ndaw rin, gangq dwk gwnznamh, mboujdan doenghgo cungj hawq roz, doihduz hix deng daindat, bouxvunz ndoj youq ndawranz hix oemq ndaej gyaeuj ngunh caez. Bae daengz suenbyaek mbaet makcej, mwngz couh yawjraen makcej gaenq deng dak hawq, namzgva naengheu youh nyez youh geng. Gij ndit remjcik hawj vunz diemheiq mbouj ndaej, daengx ndang unqnaiq, mbouj miz maz yinxdaeuz bae guhcaemz guh- angq. Bouxhung daengz doengxhaemh 6 diemj cung gvaqlaeng cij haengj okdou. Doengxngoenz, gyoengqde cungj ndoj youq ndawranz, cij miz gyoengq dou doenghgij lwgnyez cij gamj daengz gyangbaq bae, youq laj ndit aengfwdfwd buet bae buet dauq.

Dahnuengx gou Ah Yingh gaenq ndaej 6 bi, lumj duz gaeqlwg gwq riengz laeng gaeqmeh nei, cungj maij nem gou.

“Mwngz aeu bae guh maz? Gou hix bae.” De cungj dwg baenzneix gangj.

Meh gou couh ndwn youq henz bang de:“Mwngz baenzlawz guh daeg- beix ne?”

Gou gaenbonj mbouj rox baenz- lawz han, cijndei daiq de caez okrog.

Dauqdaej cingq doxdax, mbouj miz vunz haengj dingz roengzdaeuj rex de.

“Itcig buet coh bya bae. Mbouj ndaej gvaengz, mbouj ndaej riengz vunz baihlaeng, mbouj ndaej dingz roengzdaeuj. Byawz daengz ceiq laeng couh deng fad.” Ah Veij gaenq dingh ndei gij gveihcwz doxdax, hoeng doiq gou soeng di:“Baenz lo, dahnuengx mwngz iq lai, goj mbouj camgya baez doxdax neix.”

“Gou mbouj iq lone, gou yaek ndaej 7 bi lo.” Dahnuengx mbouj fug, buek naeuz,“Gou hix aeu buet!” Doeklaeng de couh deng laemx lo.

Hojsik, Gou bonjlaiz goj ndaej mingz daeuz, seizneix deng Ah Veij ciengj bae lo.(caengz sat)