Gaxgonq, lwgda duzdouq mbouj lumj binghda baenzneix hoengzfwgfwg, dujrwz hix mbouj raez, naengbak hix dwg baihgwnz baihlaj song limq. Engq dwggyaez dwg, de lij miz diuz rieng hung bwnnyumnyum lumj noucoengz. Duzdouq gig vih swhgeij baenzneix gyaeundei daekeiq fwngfwng, lij ciengzseiz yawjsiuj bouxwnq dem.

Miz ngoenz ndeu, duzdouq okdou bae guhcaemz, gvaq aen ranzyawjbingh duzmou canghyw, de doq dopfwngz doq ciengq go hwnjdaeuj:“Mou rieng iq, mou rieng iq, diuz rieng iqet dinj youh ndoq.”

Duzmou canghyw baez nyi couh huj ndaej gyangz baez ndeu, couh mbouj leix duzdouq.

Duzdouq youq gwnz loh bungz daengz duzma daeggo soengq saenq, couh youh riu dwk ciengq:“Duzma bak soemset, duzma bak soemset, bak soemsetset henx gaiq ndok.”

Duzma daeggo cingq muengz dwk, caengz duzdouq da ndeu, couh mbouj leix de.

Duzdouq couh engq daekeiq lo. De youh buet haeuj ndaw bouq- nienjhaeux bae, diuq hwnj gij nienjrin duzlawz daxgoeng cingq rag haenx, daihsing ciengq:“Duzlawz rwz raezrang, duzlawz rwz raezrang, duj rwz raezrang song mienh geiz.”

Duzdouq cingq ciengq dwk, mbouj haeujsim couh daj gwnz nienj conj roengzdaeuj, deng aennienj daenz raek diuz rieng hung. Dujrwz deng gaz youq gwnz dauq nienj, deng rag ndaej raezrang. Ceiq youqgaenj dwg naengbak byoengq lo, dek baenz sam limq!

Duzlawz daxgoeng cingq laep lwgda haeujsim rag nienj, dingqnyi duzdouq hemq, doq dingz roengz- daeuj. Duzlawz daxgoeng doq rex duzdouq, doq hemq vunz daeuj bangfwngz. Seizneix duzma daeggo cingq soengq saenq gvaq gizneix, couh buet bae heuh duzmou canghyw daeuj.

Duzma daeggo gig vaiq couh daengz ranzyawjbingh duzmou canghyw. Duzmou canghyw ganj daeuj bang duzdouq duk gizsieng. Duzdouq gwq daej lo, lwgda couh bienq ndaej hoengzgywggywg lo. Daej swhgeij cabheiq, loengh baenz gij yienghceij yakyawj neix.

De nyinhnaeuz swhgeij mbouj wnggai riu duzmou canghyw、duzma daeggo、duzlawz daxgoeng. Seizneix gyoengqde baenzneix bangfwngz, caen doiq mbouj hwnj lo.

Daihgya gienq de, cijaeu gaenx guhhong, simndei sim soh, baenzlawz yiengh hix mbouj youq- gaenj. Duzdouq ngaekngaek gyaeuj.

Ndigah, duzdouq couh bienq- baenz gij yiengh ngoenzneix mwngz raen lo.