Sai:

Ciuhvunz geijlai gvangq,

Ndaej angq geijlai seiz,

12 ndwen gvaq bei(bi),

Gvaq seiz vaiq dangqmaz.

Mbwk:

Ciuhvunz geijlai gvangq,

Ndaej angq geijlai nanz,

Geijcib bi seizgan,

Miz maz nanz mbouj gvaq?

Sai:

Vanzlij lix couh gwn,

Lij baenz vunz couh angq,

Ngoenzcog bingh haeuj ndang,

Yaek angq aiq yiem gvaiz.

Mbwk:

Vanzlij lix couh gwn,

Lij baenz vunz couh angq,

Saek ngoenz mbouj ndaej gangj,

Yaek angq caemh mbouj ndaej.

Sai:

Vanzlij lix couh gwn,

Lij baenz vunz couh diuq,

Saek ngoenz mbwn mbouj yiuq,

Dawz bae siu baenz daeuh.

Mbwk:

Vanzlij lix couh gwn,

Baenz vunz couh vuenyungz,

Saek ngoenz moek ndaw rungh,

Aeu maz riunyumnyum.

Sai:

Ndaej angq couh aeu angq,

Makvangh gyaeu geij cin,

Ngoenzcog dai mbouj ning,

Fouz sing hix fouz ngaeuz.

Mbwk:

Ndaej angq couh aeu angq,

Ndaej riu couh doq riu,

Ngoenzcog mbwn mbouj yiuq,

Baeq diuqdep bae youz.