Baezbaez duzvaiz youq gwnz ndoibya doiqnaj doxdaemj, gou couh raen dwglau lai. Beixmbauq ha, mwngz vihmaz cungj angqvauvau dopfwngz ne? Beix mbouj gyaez gyoengqde doxndei caemh gwn nywj ga?

Boh naeuz, bouxmanzyak cingq gyaez doxmoeb bw. Beixmbauq ha, mwngz manzyak dahraix.

Baezbaez duz gaeqboux ranz dou caeuq duz gaeqboux wnq doxdot, gou couh aeu faexgyaengh laeh gyoengqde deuz. Beixmbauq ha, mwngz guhlawz mbouj hawj gou laeh ne? Guhlawz baezbaez cungj dwg hawj gyoengqde doxdot roujnding gwnz gyaeuj ok lwed bae, bwn cungj dot doek rim gwnz namh bae ne? Mwngz guhlawz lij angqvauvau ndwn youq bangxhenz yawj guhcaemz ne? Mwngz haemz gyoengqde doxndei caez guhcaemz ga?

Boh naeuz, bouxmanzyak cij hozndat bouxwnq doxndei bw. Beixmbauq ha, mwngz yakdoeg dahraix.

Baezbaez daekgaeuj youq ndaw nywjcaz guhfwen, gou couh angqvauvau. Hoeng, beixmbauq ha, mwngz guhlawz baezbaez cungj gaeb daekgaeuj daeuj gyaeng haeuj ndaw hab’iq bae, lij ciengzseiz coq gyoengqde haeuj ndaw batnaj bae hawj gyoengqde doxhoenx ne? Daekgaeuj doxhoenx yied yak, mwngz couh yied angqfaengz. Gyoengqde doxhaeb ga cungj raek liux, beix couh angqvauvau. Vihmaz ne? Beixmbauq ha, mwngz haemz daekgaeuj youq ndaw nywjcaz angqvauvau guhfwen ga?

Boh naeuz, bouxyakdoeg cij baengh sieng vunz guh’angq bw. Beixmbauq ha, mwngz yakdoeg dahraix.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）