Ngoenz neix dwg cieng coit. Vahsug naeuz：coit co’ngeih bae doh haw. Langh seizneix mbouj okbae youz, couh ienqhoij dahraix! Yienghneix le, daxmeh couh ok geiqmaeuz dingh ndei le, gou caeuq daxmeh vanzlij mehnax bae Sinhvaz Suhden cawx saw.

Daj ndaw Sinhvaz Suhden okdaeuj, gou fwngz gaem bonj saw simgyaez haenx, doq byaij doq yawj. Byaij bae byaij bae le, sawqmwh din gou dik deng yiengh doxgaiq mbouj rox dwg gijmaz ndeu, gou mizsim yawj haeuj lajdin bae, neix raen aen siegdang hung dangqmaz ndeu youq henz din gou bibuengq mbouj daengx, yienhda lai, neix dwg aen siegdang moq ndeu. Gou yawj seiqhenz, youq giz mbouj gyae, miz aen dan ndeu cingq gai gij doxgaiq neix. Danhseih bouxcawj aendan haenx mbouj rox aen siegdang doek roengz gwnznamh daeuj, liuxle youh deng gou dik dawz lo. Gip hwnjdaeuj roxnaeuz mbouj gip ne? Seizneix ndaw sim gou lumj miz song boux vunziq doxceng nei. Boux vunziq ndeu naeuz：“Yawj maz yawj, neix mbouj dwg aen sieg mbouj dijcienz ndeu ndwi ha? Ganjgip deuz bae, fanjcingq mbouj miz vunz raen, mbouj miz byawz rox dwg mwngz dik deng, noix gienh saeh ndei gvaq lai gienh saeh. Vanzlij ne, daxmeh caeuq mehnax mwngz gaenq bae gyae lo.”Boux vunziq wnq ciuq dauhleix ceng naeuz：“Mbouj ndaej, mwngz bungz gienh saeh neix gvaq, couh deng guenj daengz byai bae, mboujne couhdwg boux mbouj miz daudwz nauq. Ganjgip gip de hwnjdaeuj, dawz dauqbae hawj vunz, neix dwg cungj binjdwz ndei ndeu.”Gou mbouj ngeix baenzlai, dangseiz yaengx gaemgienz dub coq boux vunziq daih’it.

Gou gaeuz hwet roengz, gip aen siegdang haenx hwnjdaeuj, vaiqvaiq byaij coh aen dan de bae,“Hawj mwngz, neix dwg aen siegdang doek duh sou ba!”Gou lejsing naeuz.

“Wz, gyo’mbaiq mwngz, baengzyoux iq!” Boux gai siegdang haenx, dwg boux mehmbwk ndeu, yawj yienghsiengq de daihgaiq miz samcib daengz seiqcib bi, daenj geu buhhung hoengzmaeq ndeu, byoem de deng rumz ci le mizdi nyungq lo, gou dawz sieg dauq hawj de seizhaenx, de baez lej rig gaeubak doxhwnj, naj mizdi mong riu coh gou. Gij najriu de lumj raemxraeuj ndaw dungx lae doh daengx ndang gou, hawj gou boux lij mizdi dwgliengz neix dangseiz couh raen ndawsim raeujrubrub bae.

Baez neix, gou coengh bouxwnq, yienznaeuz dwg gienh saeh iqet ndeu ndwi, danhseih lij hawj gou ndawsim angqfaengz bae. Seizneix gou ngeix daengz coenh vah ndaw govwnz《Gauh’wjgih Caeuq Lwg De》ndeu：“‘Hawj’, ciengxlwenx lai angq gvaq‘aeu’!” Gou rox gij eiqsei neix le riu baez ndeu, byaij bae gyaep dawz daxmeh caeuq mehnax.

（Yangz Denhcinz）