Seizcin fwn doeksese, raemxfwn roq haeuj gaiq bohliz aencueng bae, miz sing yiengj dikdak dikdak. Gou naengh youq baihnaj daizsaw, muenghyawj rog cueng gij gingjsaek maez- vunz haenx, sim ngeix daengz vunz ndaw ranz.

Gou ngeix daengz yahgeq gou. Yahgeq gou vunz mbouj sang, byoem haumumu, baihlaj miz fouq lwgda ronghliglig ndeu. Gou ndaej geiq de cungj nyaengq guh hongmaecim(hong dajnyib dajsiuq daengj), de itsim nyinh- caen guhhong, yienghsiengq gyaeundei lai, neix gou raen de bienq baenz boux unqswnh ndiep- gyawj ndeu. Mizseiz gou raen de dwg boux doiq gou yiemz dangqmaz ndeu, langhnaeuz gou gwn ngaiz seizhaenx mbouj re couh deng naedngaiz doek gwnz daiz, de couh aeu lwgfwngz roq najdaiz yiengj“dung dung dung”mbouj dingz mbouj duenh nei, neix soh daengz gou rox loek le gip naedngaiz hwnjdaeuj de cij daengx lo.

Yahgeq lij lix seizhaenx gyaez gou lailai. Baez bae ranz de guhcaemz, gou cungj boux daih’it cungj haeuj ndaw rug yahgeq bae. Yahgeq raen gou daeuj le, couh got gou haeuj ndaw rungj de bae, daj ndaw daeh de mbon ok gaiq dangzcij ndeu ndenq hawj gou, liuxle aeu fajfwngz youh hung youh nyouqnyat haenx rub byoem raezrangh gou. Youq ndaw sim gou, gou raen neix dwg saeh hawj gou sim angq dangqmaz bae. Danhseih seizneix gou baenzlawz hix mbouj ndaej raen yahgeq gou lo, aenvih de gaenq bienqbaenz ndaundeiq mbin gwnz mbwn, deuz aen seiqgyaiq neix bae gizwnq lo.

Fwn seizcin lij doek mbouj dingz mbouj duenh, rogcueng ngeiq goliux riengz rumz bi bae buengq dauq, neix couh lumj gij simngeix youq ndaw ukgyaeuj gou baebae dauqdauq nei……

（Cangh Yizyiz）