Beixmbauq ha, mwngz naeuz vamoiz ak raixcaix, dwg aenvih de youq gyang rumzbaek fawhnit hailangh, dwg lwi?

Fawhnit nit dangqmaz bae, rumzbaek haenq dangqmaz bae, mbouj miz ndokva lawz ngah youq fawhnit hailangh, cungj gyaez gag caemrwgrwg deqcaj fawhraeuj ndwi.

Vihmaz vamoiz hailangh angqyangz lailai ne?

De dwg gwedgalaux rumzbaek nitsisi neix dahraix go, de dwg daeuhgyo fawhnit nitsisi neix dahraix go!

De gyaez fawhnit vunzlai cungj haemz haenx dahraix go,

De haemz fawhraeuj vunzlai cungj gyaez haenx dahraix go.

Dwg lwi? Fawhraeuj raeujrubrub daengz gvaq, ndokva rim bo angqfaengfaeng hailangh, de couh baenz mak soemjsetset mbouj miz saek ngoenz bienq van.

Vunzlai bouxboux cungj doeknaiq caemrwgrwg seizde, de couh angqvauvau; vunzlai bouxboux cungj angqvauvau seizde, de couh naiqnetnet. Beixmbauq ha, cungj ndokva neix dwg- gyaez ha?

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngz- meh/卢奋长 hoiz）