Miz vunz naeuz, ndaw biengz vunzraeuz cienzngaenz ceiq yougaenj, aenvih cienzngaenz hawj vunzraeuz naemj maz ndaej maz; miz vunz naeuz, ndaw biengz vunzraeuz seizgan ceiq youqgaenj, aenvih seizgan bae le mbouj dauq lai. Danhseih gou baenzneix naemjngeix, ndaw biengz vunzraeuz onjndei ceiq youqgaenj, aenvih onjndei caeuq minghvunz doxbaengh doxnangq haenq lailai.

Gou ndaejgeiq miz baez ndeu, daxboh caeuq gou daj Vuzyez Gvangjcangz dauqma ranz, mbwn yied bienq yied laep, rumz yied ci yied haenq, duzbeih yied mbin yied daemq, neix gou raen mbwn yaek doek fwnhung lo. Daxboh aeu yaekseiz hai cidienhbingz, yaeuq din hwnj gwnz banjcaij, couh hai ci doz gou sohsoh ganj dauqma ranz, rumz youq henz rwz gou ci“huhu”, youq gyang mbwn laepngauq gwnzhaenx, sing byaj lumj duznyaen yak ndaw ndoeng nei rongx bae rongx dauq.

Daengz giz sokloh song ga loh doxgap, gizhaenx miz daenghoengz daengloeg vixyinx, seizhaenx bae soh baihnaj couhdwg daengloeg rongh lij lw sam miux cung, daeng vixyinx gvaq baihnaj ngeuj baihswix bae lij dwg daenghoengz, lij lw sam miux cung couh rongh daengloeg; danhseih daxboh hai vaiq lai, ci soh hai gvaq baihnaj ngeuj baihswix bae! Neix baenzlawz ndaej ne? Gou ngamq yaek daezsingj daxboh, danhseih mbouj dad lo, cidienhbingz soh baenaj ngeuj coh baihswix bae lo! Gou cijndei laepda youq, ndaw sim lumj miz duzdouq ndeu diuq“bubbub”mbouj dingz mbouj duenh, gou ndawsim gag gouz mbwn gaej hawj ci dou daemj gij ci soh daeuj haenx. Caeklaiq seizheiq ndei, seizhaenx mbouj miz ci soh daeuj. Gvaq sokloh neix le, gou aensim lumj deng gonj rinhung ndeu dimz coq nei heiq cuengq mbouj hwnjdaeuj, gvaq liux vanzlij raen dwglau lailai, daxboh baenzlawz cung daenghoengz ne? Yienghneix guh couhdwg dawz mingh mbouj dang mingh bw!

Dauq daengz ranz le, gou cingq- ging dangqmaz naeuz daxboh：“Daxboh, mwngz lumz raeuz gaxgonq guh cozyez gvendaengz baenzlawz bauj ndaej onjndei luma?Deng ciuq gij gvidingh gyaudoeng bae hengzguh bw! Yienznaeuz‘yaepseiz bengz lumj gim, gim cawx mbouj ndaej saekseiz’, danhseih mwngz mbouj ndaej ganj seizgan couh dawz mingh mbouj dang mingh ha!”

“Seizhaenx gou raen yaek doek fwnhung, couh lumz lo.”Daxboh gaeu- gaeu gyaeuj najnyaenq le naeuz, “Lwg ha mwngz gangj ndaej doiq! Daxboh hab deng ndaq! Seizgan youqgaenj, minghvunz lai youqgaenj, neix daxboh geiq maenh lo, baelaeng deng haeujsim bauj ndang mingh ndaej onjndei, ciuq gvidingh gyaudoeng bae hengz!”

Dwg ha, minghvunz caeuq onj- ndei doxnangq guhdoih, mbouj haeujsim bauj onjndei, minghvunz hix mbouj miz lo, seizgan caeuq cienzngaenz hix mbouj miz lo. Vunzraeuz mbouj ndaej damdoz fuengbienh couh mbouj haeujsim bauj onjndei, ndigah daxboh baezneix hab deng ndaq dahraix!

（Fungz Yilingz）