Baez gou dauqngeix baez daih’it ndot dangz, couh gag najhoengz lai. Gij saeh haenx couh lumj lix youq baihnaj nei, lumz mbouj bae saek di.

Miz ngoenz ndeu, banhaet seizcou, gou cingq hwnj dangz Yinghyij. Gyoengq doengzhag cungj rox gou mbouj maij dangz Yinghyij, gou gag nyinhnaeuz hag ndei yijvwnz couh baenz lo, gou youh mbouj ok rogguek bae, hag Yinghyij miz maz yungh ne? Hwnjdangz seizhaenx gou raen mbwq lai lo, sawqmwh miz aen naemjfap ndeu, ndot okbae yaep ndeu ba! Hoeng mbouj rox baenzlawz ndot okbae ne? Cingq youq seizhaenx, gou yaengx fwngz sangsang bae, lauxsae raen le couh naeuz：“Vanz Cinzsoz, mwngz gingz fwngz guhmaz?”Gou naeuz：“Gou yaek bae diengzhaex.”Lauxsae naeuz：“Gou cingq hwnj- dangz, mwngz yaek bae diengzhaex, mbouj ndaej.”Yienghneix le, aen dajsuenq gou mbouj ndaej hengz lo, gou lij deng lauxsae ndaq geij coenz dem.

Gvaq yaep ndeu couh roengz- dangz lo, lauxsae naeuz：“Vangz Cinzsoz doengzhag, mwngz ndaej okbae lo.”Baezneix gou ndot dangz mbouj ndaej le, sim lij mbouj fug, gou dajsuenq daengz dangz Yinghyij laeng le, gou soh deuz bae gizwnq ndoj youq.

Neix daengz dangz Yinghyij laeng gou couh ndot dangz lo. Gou cingq youq gizwnq guhcaemz angq- yangz dangqmaz seizhaenx, deng ndaw ban dou boux doengzhag“maij guenj saeh”ndeu raen lo, caemhcaiq beng gou dauqbae hagdangz, gyau hawj lauxsae. Lauxsae mbouj fatheiq coq gou, cij lwnh aen goj“manaez daeuj lo”hawj gou dingq. Gangj liux le, lauxsae naeuz gou：“Mwngz seizneix couhdwg bouxnyez haenx, langhnaeuz mwngz cingq langh yiengz, raen mbwq le couh yaeuh vunz, liuxle gag yaeuh vunz yaeuh swhgeij ma?”Gou han naeuz：“Mbouj.”

Gou rox aen gojgaeq lauxsae gangj hawj gou nyi haenx miz aen dauhleix ndeu：Guh boux siujhagseng ndeu, raeuz mbouj ndaej gangj yaeuh, yaek guh boux nyez ndei ndeu, simsoh, gangj daengz guh daengz.

(Vangz Cinzsoz)