Boh’au yaek cawx cimoq lo, daxboh gou dangguh bouxhaici geq ndeu bae coengh ok geiqmaeuz：“Mwngz lai hab cawx gyaq Audiz.”

Gvaq song ngoenz le, boh’au cawx cimoq dauq lo. Daxboh raen le doeksaetyat dangqmaz：“Gou mbouj dwg heuh mwngz cawx Audi ma? Cungj ci neix gou caengz raen nauq!”Hoeng boh’au ndaenggon dangqmaz naeuz：“Beix ha, neix mwngz mbouj rox ba? Neix dwg gyaq ci dienhdoengh sinhnwngzyenz ndeu.”“Ci sinhnwngzyenz?”Gou nyi le couh buet gvaqbae yawj gvaqyinx.“Hw! Yiengh ci lwenqda lai, dozveh ndeiyawj dangqmaz, ndang ci luemjmyabmyab, dwg gyaq ci ndei.”Gou hemq naeuz. Daxboh yawjsiuj le doiq gou caeuq boh’au naeuz：“Sou gyoengq bouxcoz neix ne, cawx ci cij yawj baihrog, baenzlawz mbouj yawj dungxndaw.”Boh’au riu han naeuz：“Neix raeuz gak boux hai ci swhgeij okbae beij baez ndeu ndaej mbouj?”“Beij.”Daxboh gangj sat couh hai ci swhgeij okbae lo.

Boh’au daiq gou hai gyaq cidienhdoengh de lumj gaiq naq nei gyaep okbae, baez yaep da couh mauh gvaq gyaq ci daxboh lo. Lumjnaeuz daxboh gya dangj lo, gyaq ci de couh yiengj“huhu”nei, gaiq gyongj okheiq haenx hoenzndaem conhfofo bae, ci hamj dou bae lo. Boh’au raen le, lej caij dienhmonz, hamj gyaq ci daxboh bae ngaihnoed. Gou naengh youq ndaw ci raen youh onj youh caem.

Song aen ci neix beijvaiq 20 lai faencung le, doxdax couh sat lo. Gou cingqging dangqmaz senhbu naeuz：“Gou sijsaeq yawj le, cidienhgoengh buet lai vaiq, sing caem ndei, vanzlij mbaet nwngzyenz, lai vanzbauj dem. Baez doxdax neix, boh’au hingz lo.”

Daxboh baez gaeu gyaeuj, najnyaenq naeuz：“Seizdaih hwngfat vaiq dahraix, gou riengz mbouj dad seizdaih lo, daj danci——cimohdoz——cidienhdoengh——cigiceh——ci sinhnwngzyenz giceh, giceh hwngfat couh dwg guekcoj raeuz hwngfat. Daengz gyaq ci gou ning mbouj ndaej lo, gou hix aeu riengz seizdaih moq bae cawx gyaq cidienhdoengh lo!”

(Youz Yungzhau)