Gou daj gizlawz daeuj ne? Meh ha, gou guhlawz daeuj daengz henz ndang mwngz ne?

Lumj boh gangj gojgaeq yienghde, gou caeuq beixmbauq caemh dwg ok ndaw aen’gyoux daeuj, dwg lwi?

Go gaeugyoux de goj lumj go raeuz seizneix ndaem youq bak- dangq de, gaeu raezrangrang, banh doh gyaqbungz deihdaen- daen, dwg lwi?

Mbaw de goj heuswdswd, dwg lwi? Goj hai va baenz duj baenz duj hausaksak, dwg lwi? Goj miz di heiq ndeu miz didi hom mbouj ngaih ndum ndaej daengz, dwg lwi?

Aen makgyoux de goj dwg ndokvahau loenq le cij baenz aen youq gwnz gaeu, menhmenh maj- hung, caeuq makgyoux wnq caemh venj youq gwnz gyaq, dwg lwi? De hung gvaq makgyoux wnq liux bae, dwg lwi?

Goj heusausau, dwg lwi? Roxnaeuz dwg henjrwkrwk lumj makbug baenz ndei ne? Roxnaeuz dwg ndinghoengz gyaeundei lumj makyungz ne?

Mwngz ngoenzngoenz cungj yawj makgyoux majhung, dwg lwi? Mwngz ndawsim angqvauvau, dwg lwi?

Doeklaeng, dwg gou gag daj ndaw makgyoux ndonj okdaeuj, dwg lwi? Mwh gou ndonj okdaeuj de, mwngz youq henz ndang lwi? Langhnaeuz mwngz mbouj youq henz, nyaenx gou guhlawz daeuj daengz henz ndang mwngz, bongh haeuj ndaw rungj mwngz bae ne?

Lumj raemxraiz gyanghaemh nei, mbouj hawj vunzlai yawjraen, laeglemx ndoj youq gwnz limqva, dwg lwi? Mwngz gyanghaet ndiu le, cix raen gou youq ndaw rungj mwngz lo, dwg lwi?

Lumj duzmbaj gyaeundei nei, youq seiz banringz caemrwkrwk de laeglemx aj fwedraiz mbin daeuj daxhongh, dwg lwi? Lejsing heuh mwngz, mbouj ndwet mbouj hauq couh ndwn youq dangqnaj mwngz, dwg lwi?

Nyaenx ne, mwh mwngz baeznduj raen gou, mwngz guh- lawz rox gou dwg lwg mwngz ne? meh ha.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）