Bohgo gou dwg boux“ranzdaeuz ciengx mou”. Daxbuz dou lwnh naeuz ranzbohgo ciengx 80 lai duz mou. Baengh ciengx mou canh ndaej haujlai cienz.

Daxbuz lwnh naeuz bohgo ciengx mou, dwg aenvih cungj dinfwngz neix youz ranz de daih ciep daih swnjcienz roengzdaeuj. Youq mboengqseiz gyoengqde lij iq, ndaw ranz cungj ciengx geij duz mou, gvaqcieng cungj gaj saek duz mou ce gwn noh. Ciengx mou fuengbienh dangqmaz bae, aenvih gyoengq mou gwn byaeklw ngaizlw guhdaeuz. Langh dou ciengx gyoengq mou ndaej bizbwdbwd lo, couh ndaej gai bae. Ndaejnyi daxbuz lwnh, mizseiz mou bengz dangqmaz, duz ndeu couh gai ndaej cien lai maenz. Bohgo youq neix ra ndaej diuz roen baenzfouq, heij guh riengh ciengx mou lo.

Ciengx mou“bae goek noix, ndaej cienz lai”. Gueng ngaih dahraix. Ndaw riengh nda coq geij aen ruq, liuxle coq gijgwn haeuj ndaw ruq bae, mou couh comz gvaqdaeuj humx aen ruq gwn. Danhseih, gijmaz saeh cungj mbouj dwg lumj ruz ndaej rumz ci baenaj. Miz baez ndeu, aenvih miz duz mou ndeu deng raq dawz lo, neix lah daengx riengh mou cungj deng raq dawz dai bae caez. Deng mbat saehhung neix le, bohgo bak mbouj gvaiq mbwn sim mbouj gvaiq vunz, hix mbouj naiq. Gingciengz miz vunz cam de：“Haenqrengz gaenxguh dwgrengz dangqmaz cij ndaej gijneix le, youh baenzneix deng bae lo, mwngz baenzlawz mbouj simnaiq ha?”Bohgo riu naeuz：“Vihmaz yaek simnaiq ne? Bouxlawz cungj deng saetbaih gvaq. Baez neix saetbaih lumj miz vunz roq aen cungj daezsingj gou nei.”Neixliux bohgo bienqbaenz boux guhsaeh hunghung iqiq cungj haeujsim nyinhcaen dahraix. Gyoengq mou lij iq seizhaenx de couh dajcim coq, fuengzre binghraq dawz mou.

Cienz ndaw daeh yied daeuj yied lai, danhseih bohgo hix mbouj ndaenggon, vanzlij haenqrengz guenj ndei “aen guekvuengz seng’eiq” de. Vihliux hawj gyoengq lwgnyez gvaq ndaej lai ndei, okcienz hawj gyoengqde doeg dayoz, bohgo cungj ngoenzngoenz hwnq romh guh daengz laep, baenz le boux“ranzdaeuz ciengx mou”dahraix.

（Cau Ginhhau）