Gou gyaez dingq daxboh gangj gojgaeq dahraix, aenvih gij gojgaeq daxboh gangj de mizyinx raixcaix.

Daxboh guhlawz miz doenghgij gojgaeq mizyinx de lai baenzneix ne?

Daxmeh lwnh gou dingq: Boh yawj gvaq haujlai saw go! Doenghgij gojgaeq mizyinx neix cungj dwg ndaw saw raiz miz go!

Gou heuh daxmeh ce doenghgij saw neix hawj gou, gou majhung le, goj yaek doeg doenghgij saw raiz gojgaeq neix. Hoeng daxmeh naeuz, doenghgij saw neix deng vunz aeu bae coemh liux lo.

Vihmaz coemh doenghgij saw neix liux bae ne?

Daxmeh yienghneix naeuz ndwi: Lwg ha, gaej cam lo, seizneix mwngz lij caengz rox; gaejlaeg bae cam boh, cam de de couh mbouj angq lo.

Couhdwg aenvih gou seizneix lij caengz rox cij yaek cam go! Meh vihmaz mbouj ngah lwnh hawj lwg dingq ne? Vihmaz lij mbouj hawj gou bae cam boh dem ne? Gij saeh sawj boh mbouj angq de, lwg coj mbouj bae cam dahraix go.

Vihmaz yaek coemh doenghgij saw raiz gojgaeq neix bae ne?

Dwg mbouj dwg miz vunz mbouj gyaez doenghgij gojgaeq neix ne? Hoeng, doenghgij gojgaeq neix miz- yinx baenzneix, gyoengqde vihmaz mbouj gyaez ne?

Dwg mbouj dwg aenvih gyoengqde yak lumj duzguk, rwix lumj duzmanaez, vaddaeuz lumj duznyaenma, yakyawj lumj duzroega ndaw doenghgij gojgaeq neix, gyoengqde mbouj gyaez doenghgij gojgaeq neix, couh coemh doenghgij saw raiz gojgaeq neix bae ha?

Caeklaiq daxboh lij geiq ndaej doenghgij gojgaeq neix, gou goj yaek geiq doenghgij gojgaeq boh gangj neix maenhdetdet bae. Daengzcog, gou goj miz lwg le, gou goj gangj doenghgij gojgaeq neix hawj lwg gou dingq. Lwg gou majhung le, goj miz lwg le, lwg gou goj gangj doenghgij gojgaeq neix hawj lwg de dingq. Aenvih, doenghgij gojgaeq neix cungj mizyinx lailai.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）