“Vahvah”dwg boux baengzyoux ceiq ndei gou.

De ndang daemqdetdet、biz- bwdbwd ne, daengx ndang hwnj rim bwnhau caeuq bwnndaem, unq- nemnem、wenjlili, byawz raen cungj yaek lumh mbat ndeu. Vahvah aen gyaeuj nduenndindi, gwnz haenx miz fouq rwz samgak ndeu, langh bangxhenz miz maz ningdoengh, rwz de couh daengj sohsoh hwnj- daeuj. De doiq lwgda ronghliklik, banhaemh vanzlij rongh bw! Vahvah baihlaeng ndang miz geu rieng youh iq youh raez ndeu, ciengzseiz bi bae bi dauq mbouj dingz mbouj duenh, ndaeng- gon dangqmaz.

Vahvah ceiq maij caemz giuz- bwnyungz. Miz ngoenz ndeu, gou raen de bomq youq gwnz namh yiengh naiq lai, couh bae doj de. Neix gou dawz aen giuzbwnyungz daeuj caemz, de raen le, couh gaenj hwnjdaeuj, soh dingj gyaep aen giuzyungz, lumj naeuz：“Aeu giuz- bwnyungz hawj gou, vaiq di hawj gou!”Gou dawz giuzbwnyungz gaem maenh bi bae bi dauq, yaep bi haeuj baihswix, yaep bi haeuj baihgvaz, mbouj hawj de gaemhdawz, neix le de lumjnaeuz hozndat lo, de baez heuh“meuh”sing ndeu, youh bomq gwnz namh youq, lumj naeuz：“Hw, mbouj leix mwngz!”Gou raen de hozndat lo, couh aeu giuzbwnyungz hawj de, Vahvah dauq gaenj hwnj- daeuj lo, sim mbouj miz maz fanz lai lo.

Vahvah dwg duzmeuz ngahgwn damgwn dahraix, baez raen gou gwn ngaiz, de couh maeuq youq henz ga gou myaiz lae mbouj dingz bae. Gou nip gaiq nohbya ndeu vit hawj de, de raen le, gikdoengh dangqmaz, buet bae coh gaiq nohbya, gaemdawz gaiq nohbya le, song ganaj gaemh- dawz gaiq nohbya maenhmaenh bae, lauheiq deng bouxwnq dued bae. De doq gwn ndaw bak doq oksing“vuhvuh”, lumj naeuz：“Ndeigwn lai, ndeigwn lai!”

Duz meuz iq ranz gou dwggyaez mizyinx dangqmaz, dwg lwi?

(Vei Yingzyingz)