Seiz gou lij iq, gingciengz dingq bohmeh gangj haujlai gojgaeq, dingzlai dwg gojgaeq coengh vunz ndaej sim angq.

Lumjnaeuz, miz daxbuz geq ndeu youq gyang roen miz ci baebae dauqdauq haenx laemx lo, miz daegmbauq ndeu gipmuengz gvaqbae rex de hwnj- daeuj, bouxswhgih raen le hix bouxboux daengx ci lo……

Seizneix, langh miz vunz raen boux daxbuz geq ndeu laemx youq gwnz roenvunzbyaij, mboujdanh mbouj miz vunz bae rex de hwnjdaeuj, vanzlij yawjsiuj de dem. Lij miz vunz hai soujgih ingj sibinz, vanzlij naeuz neix dwg de yaeuh vunz bw. Neix daxbuz geq naj bienq baenz youh hojlienz youh mbouj miz banhfap, mbouj miz byawz coengh de, neix vihmaz baenzneix ne?

Youh lumjnaeuz, miz vunz gip ndaej aen daehcienz ndeu, youq dieg gip ndaej haenx caj le baenz ngoenz bae, langh bouxlaw daeuj ne, couh gyau hawj bouxlaw, langh bouxlaw mbouj daeuj, couh gyau hawj gingjcaz, liuxle cij baema lo.

Seizneix, geij ngoenz gonq gou raen boux ndeu youq henz roen gip ndaej mbaw 100 maenz ndeu, bouxde yawj doeng yawj sae, rox vunz mbouj raen de gip ndaej cienz, couh gipmuengz coq haeuj ndaw daeh de bae, deuzbae vaiq dangqmaz. Gaej gangj gip ndaej cienz mbouj caj bouxlaw, mizdi vunz vanzlij caeg cienz、duet cienz, neix vihmaz baenzneix ne?

Vanzlij miz gojgaeq gvendaengz gaujvaq ra ngaiz, boux gvaq roen cungj daraen hojlienz de, mizdi vunz hawj ngaiz, mizdi vunz hawj cienz, vanzlij mizdi bouxmiz sou haujlai gaujvaq nyez youq roengzdaeuj.

Seizneix, haujlai vunz raen gaujvaq le cungj dang da mbouj raen ne, neix hix mbouj ndaej gvaiq boux gvaq roen caez, miz mbangj dwg bouxyaeuh, vuenh le ndangdaenj boengqbangq, daegdaengq cang boem youh luenh youq gyuek, gyajcang baenz gaujvaq, yaeuh bouxsim’unq aeu cienzcaiz……

Ai, seizneix vunz sim bienq lo, caeuq boux ndaw gojgaeq bohmeh gangj haenx mbouj doxdoengz lailai bae, seiqgyaiq cungj bienq, bienq ndaej vaiq dangqmaz bae. Hoeng vihmaz simvunz mbouj bienq ndei lai vaiq di ne? Vihmaz mizdi vunz yied bienq yied ca ne? Gou ngeix mbouj doeng lo!

(Danz Gwngjyenh)