Cuengqgyaj lo, bineix dou daengx ranz yaek dauqbae ranzgaeuq Cungzging Vuhhih Yen gvaq cieng. Ranzgaeuq gou youq ndaw luegbya, miz haujlai ranz youq gyang ndoi gyang bya, lij miz mbangj doengzhag iq liz hagdangz gyae dangqmaz, daj ranz bae hagdangz couh deng bin gvaq geij goengq bya, moix ngoenz banhaet deng romhromh couh hwnqdaeuj, byaij aen lai song aen cung cij daengz hagdangz. Daxboh naeuz baez neix dauq ranzgaeuq lij miz aen hongsaeh daegbied ndeu, couhdwg yaek bae ranz doengzhag gungzhoj yawjyawj, hawj gou daejniemh saedceij.

Dauqdaengz ranzgaeuq le, dou daiq haujlai cijvaiz、daehsaw lij miz gij doenghyiengh hagsib wnq dem, daeuj daengz aen mbanj gyae ndeu. Miz boux lauxsae lajmbanj ndeu daiq dou daeuj daengz ranz dahnyez iq ndeu, ranz de diuzgen nyauq dangq- maz bae, ndaw ranz laep lai, dahnyez iq beng geu mae ndeu, aen daeng henj luenzlulu ndeu rongh lo, hoeng ndaw ranz vanzlij laep lai. Raen dou daengz neix, de najnyaenq dangqmaz, najhoengz caeuq dou gangjvah. Gou yawjraen ndaw ranz de mbawciengj rim faqciengz bae, gou yawj doenghgij bonjcozyez de, gij cihsaw ndaw cozyez hix raiz ndaej nyinhcaen dangqmaz, neix youq gwnz bonjgobwnj gaeuq boengq haenx cingjcaez yienhda dangqmaz. Gou soengq aen daehsaw moqsak ndeu hawj de, naj de youh hoengz lo. Doenghboux lauxsae caemh bae haenx lwnh gou, daxmeh de bi- gvaq couh gvaqseiq lo, daxboh ok rog bae dajgoeng, neix ndaw ranz cijmiz de caeuq daxbuz, dahnyez neix rox- yiuj dangqmaz, doegsaw haenqrengz dangqmaz, camgya ndaw yienh daxdax raiz faenzcieng aeundaej itdaengj- ciengj bw. Gou dingq le mizdi najmong, gou diuzgen ndei baenzneix, vanzlij mbouj laemxsim haenqrengz doegsaw.

Daengzlaeng dou youh bae ranz vunz youq byaibya ndeu, ci dou riengz diuz roenbya ngutngut ngeujngeuj hai hwnjbae haujlai nanz, miz geij mbat lumjnaeuz raen ci yaek doek roengz lajbya bae, sim gou yaek diuq hwnj conghhoz lo. Daengz ranzvunz de le, ndaw ranz cijmiz daegnyez iq ndeu, gou cam de bingzseiz baenzlawz bae hagdangz, de lwnh naeuz ngoenz mbwn caengz rongh couh gag dawz dendungz rongh roen byaij ca- mboujlai song aen cung cij daengz hagdangz. De simhai dangqmaz bae, neix sawj gou doeksaetyat lai, ndaw ranz de lij miz haujlai mbawciengj camgya doxdax aeundaej haenx.

Yienghneix guh ngoenz ndeu liux, gou raen gij diuzgen swhgeij bingzseiz doegsaw haenx ndei lai lo. Daxboh naeuz, maqnuengh gou rox hag gyoengqde, insik saedceij swhgeij, daengz coglaeng aeu lailai coengh bouxwnq, coengh doenghboux aeu vunz coengh haenx. Neix gou couh lumjnaeuz rox daxboh vihmaz guh hongsaeh hawj vunzbiengz souh’ik, hij rox gou wnggai baenzlawz guh……

（Liuz Swjhanz）