Beixmbauq mbaet mbawfaex iqiq ndeu roengzdaeuj, coq youq gwnz fwijbak lejlej boq, couh boq ndaej baenz cit baenz cit fwen goksasa sing raez cienz gyae.

Beixmbauq ha, mwngz boqbak couh boq baenz fwen ndeidingq baenzneix, dwg lwi?

Gou rox le, mwngz dwg laemxsim ndeindei boq bw.

Mwngz dwg boq hawj bohmeh nyi, dwg lwi? Mwngz dwg yaek hawj bohmeh yienghneix doiq gou naeuz: Mwngz dingq, beixmbauq mwngz boq digmbawfaex ndeidingq lai, dwg lwi?

Roxnaeuz, mwngz dwg boq hawj gadah dinbya caeuq duzroeg ndaw ndoengfaex ne? Mwngz yaek caeuq gadah caeuq duzroeg doxdax, dwg lwi? Mwngz dwg yaek hawj gadah caeuq duzroeg hozhaenz mwngz dahraix, hawj gyoengqde naeuz boux lwgnyez neix boq digmbawfaex ndeidingq gvaq gyoengq raeuz bw.

Roxnaeuz, mwngz dwg boq hawj nuengx dingq ne? Mwngz rox nuengx gyaez dingq fwen ndeidingq. Hoeng mwngz mbouj dwg coh gou boq ne. Mwngz doq boq doq byaij bae gwnz ndoi. Mwngz dwg boq hawj vunzlai dingq, dwg lwi? Boq hawj bohmeh caeuq gou dingq, dwg lwi? Boq hawj lungzbaj auliuz gwnz bya ndaem yw de dingq, dwg lwi? Boq hawj mbwnheu caeuq fajfwj dingq, boq hawj byaheu caeuq ndoengfaex dingq, boq hawj ndokva caeuq duzmbaj dingq.....dwg lwi?

Beixmbauq ha, bya ndoi ndaejnyi digmbawfaex goksasa duh mwngz le, ndoengfaex engq heu lo, fajfwj engq hau lo, nditndat engq rongh lo, ndokva engq nding lo, duzmbaj mbin bae mbin dauq goj engq angqfaengz lo.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）