Bohmeh aemq gou ne cingq- ciengz lai, hoeng geij ngoenz gonq banhcujyin daj ndaw gyausiz aemq gou roengz laeuz, neix caen dwg baez daih’it lo, gou raen ndawsim raeujrub dangqmaz.

Geij ngoenz gonq, miz ngoenz ndeu banringzgvaq cuengqhag le gou byaij laelaeuz mbouj re couh caij hoengq lo, din deng sieng bae, liuxle geij ngoenz neix cungj dwg daxboh aemq gou hwnj laeuz roengz laeuz.

Miz ngoenz ndeu, banringzgvaq cuengqhag le, daxboh ciep gou mbouj gibseiz, gou simvueng baenz yaek daej bae. Neix boux Cinz lauxsae biz- bwdbwd ne raen gou yienghneix le, cou nai gou naeuz:“Mwngz roengz laeuz mbouj ndaej, gou aemq mwngz roengzbae ba.”Gou sim ngeix: Gou baenzlawz hawj lauxsae aemq gou roengz laeuz ne? Vanzlij ne boux lauxsae neix biz baenzneix, moix baez hwnjroengz laelaeuz de cungj heiq conhfofo bae, aemq gou roengz laeuz de dingj ndaej rox mbouj? Gou lij ngeix sam ngeix seiq, boux lauxsae neix mbouj gangj gijmaz, soh aemq gou hwnjdaeuj, byaij ok gyausiz bae.

Gou doeksaetyat, ndang bomq youq aenlaeng lauxsae nanoek, gyaeuj bomq coq gwnz mbaq gvangqget haenx, lumjnaeuz hoemj ninz youq gwn sahfaz unqnemq ndaw ranz. Gou simgaenj lai couh mbouj gamj hai da yawj, ndawsim ngeix: Gyoengq doengzhag haengj- dingh cungj yawj gou. Caen dahraix, lauxsae aemq gou roengz laeuz mboengq haenx, miz mbangj doengz- hag daengx din yawjngonz, ndaejnyi mizdi doengzhag dahaenz naeuz ndaej lauxsae aemq ndei lailai, gou nyi le couh raen youh najmong youh vuenyungz.

Mboengq roengzlaeuz nanz lailai, duenh roen song sam faencung couh byaij liux haenx lumj deng byaij diemj cung ndeu bae, aemq gou daengz bakdou hagdangz le, lauxsae cuengq gou roengz, mizdi heiqconh naeuz：“Baezlaeng miz gihvei, gou lij aemq mwngz roengz laeuz, neix gou hix ndaej gemjbiz.”De gangj vahdwgriu, lumj rumzcin ci naj nei, gou gik- doengh lai gangj mbouj ok vah lo.

Daxboh youq bakdou hagdangz, ciep dawz gou, gou ngeng ndang yaek gyo’mbaiq lauxsae, hoeng laux- sae gaenq dauqbae lo.

Aen ciengzmienh lauxsae aemq gou roengz laeuz neix hawj vunz yawjraen le sim raeujrub dangqmaz, gou raen din gou fukdauq lai vaiq raeuh bae. Gyo’mbaiq mwngz hawj gij ndiepgyaez raeujrub hawj gou.

（Mij Vwnzyingz）