Bihaenx seizndat, gou ndaej haj bi, mbwn gig hwngq, hwngq ndaej duzgaeq fwed roemj roengz- daeuj youq, duzma iet linx, duz- bid gwnz faex heuhsaengzsaengz. Hwngq baenz gou hanh dumz gyaeuj caez, naengh youq gwnz mbinj bak dou langhliengz, lij dwg hanh lae hanh conh. Sawqmwh gou naemj daengz ndaw binghsiengh lij miz di sietdiuz he. Gou fwt buet haeuj ranz bae, hai binghsiengh, aeu gaiq sietdiuz ndeu okdaeuj, sik hai gij daehrog, haenqrengz haeb gaemz hung ndeu. A! Sangj! Gou youh haeb gaemz ndeu, caen dwg sangj dangqmaz! Gou yawj diuz sietdiuz heiq hwnjfoedfoed, couh gag naemj: Gou raen ndat baenzneix lo, sietdiuz engq ndat ba? Mbouj ne, de vihmaz hwnj fwi foedfoed ne? Gou wnggai coengh de swiq ndang ba?

Gangj guh couh guh, gou riuj bat raemxmboq ndeu daeuj, coq sietdiuz roengz raemx bae, ndaeng- gon dangqmaz gangj:“Sietdiuz, gou mbouj gwn mwngz lo, mwngz menh- menh swiqndang gonq! Gou bae guhcaemz gonq.”Gangj sat, gou couh diuqyekyek buet okbae guh- caemz lo. Hoeng, gou dauqma seiz, sietdiuz mbouj raen lo, cij raen diuzfaex fouz youq gwnz raemx. Yi, sietdiuz ne? Gou iet fwngz haeuj ndaw raemx bae gyaux hwnj gyaux roengz, cungj ra mbouj raen sietdiuz, caen dwg geizheih lai lo.

Seizhaenx daxmeh cingq ngamj roengzban ma daengz ranz, yawjraen aen yienghceij gou geiz- heih lai, couh cam:“Mwngz baenz- lawz lo? Sinhsinh.”Gou danq gaemz heiq ndeu, dawz gienh saeh neix lwnh daxmeh nyi, daxmeh dingq le, riuhaha, naeuz:“Mwngz caen huk a, mwngz mbouj rox sietdiuz cuengq haeuj ndaw raemx bae couh yungz ha?”O! Dwg yienghneix a, gou fwt singj gvaqdaeuj lo.

Haha, mwngz yawj gou iq seiz ngawz lai lai lo!

(lauxsae son’gyauq: Vangz Gveiyangh/黄桂香)