2018 nienz 8 nyied 26 hauh, haetromh haj diemj buenq ranz dou caez hwnq lo, aenvih dou miz gienh hongsaeh ndeu youqgaenj dangqmaz——soengq dahcej bae Nanzyangz doegsaw.

Dou comz ndei doenghyiengh le, gaenq daengz roek diemj lo, daxboh coi dou hwnj ci. Daihgaiq gvaq diemj cung ndeu, dou daengz Nanzyangz Si Daihngeih Cunghyoz. Ranz dou seiq boux ciuq dajsuenq faenhong, dawz le doenghyiengh byaij haeuj dou hagdangz. Ndaw hagdangz vunz cien vunz fanh, lumj aen hawciengz hung ndeu.

Dou aemq daeh daeuj daengz baihnaj mbaw“buengj faen ban”. Mbaw“buengj faen ban”henjgim haenx daj doenghlaeuz baihbaek daz daengz laeuz baihnamz, lumj rangh raemxgienghdat nei. Dah- cej daiq daxboh daxmeh, youq gwnz buengj ra mingzcoh de. Gou ndwn youq baihlaeng gyoengqde yawj doenghyiengh, gag simgip ndwi, hai mbouj ndaej goengrengz. Hawj gou yawj! Gou hawj daxmeh yawj doenghyiengh, gag buet gvaqbae, lwgda lumj daengdamqra dwk ra bae ra dauq. Daengzlaeng,“Hingz Bungzyij”sam cih saw neix deng gou ra raen lo, aen mingzcoh dahcej yienhda dangqmaz.

Cieplaeng, daxboh caeuq dahcej buen saw bae gyausiz baudau, daxmeh bae ranzsuzse hagseng mehmbwk ra mbonq, gou youq laj laeuz yawj doenghyiengh. Cungj raen daj bakdou ranzsuzse daengz roenhwnjlaeuz, daj roen- hwnjlaeuz daengz gwnz cauhcangz, miz haujlai vunz dawz doxgaiq, mizdi aemq aeu、mizdi gwed aeu、mizdi umj aeu、 mizdi riuj aeu, bouxboux hanh deklinlin, heiq conhfofo.

Daengz seiz dou cang ndei aen mbonq dahcej liuxle, gaenq dwg banhaet cib’it diemj lo.

Yawj daxboh daxmeh baeg- fefe nei, gou nyinh mbouj ndaej danqheiq：“Aen sim bohmeh lajmbwn inhoj!”

（Hingz Vansinh）