Mbwn ngoenz beij ngoenz liengz lo, rumzcou ci daeuj lo. Miz ngoenz ndeu, mbawfaex iq lijhai le aen rungj daxmeh faexhung, gagdog bae louz lo.

Mbawfaex iq naengh youq gwnz aenci rumz, daeuj daengz gyang mbwn. De caeuq daxgoeng daengngoenz doengzcaez menhbyaij, caeuq dahcej fwjhau doengzcaez diuqfoux, caeuq daegnuengx ndaundeiq doengzcaez ciengqgo, fiengx le, couh dinghyouq dingq daxbuz ronghndwen gangj gojgaeq. Dingq yaep ndeu liux, mbawfaex iq couh youq ndaw rungj daxbuz ronghndwen ninznaek lo, lij guh baez fangzhwnz ndei ndeu.

Ngoenz daihngeih banhaet, mbawfaex iq lijhai le gyoengq baengzyoux de, doek daengz gwnz gaiq diegrum ndeu. Duz moed iq dawz de dangguh aen yindungcangz, youq gwnz haenx buet bae buet dauq; duz daekgaeuj dang de guh aen liengj iq, aeu daeuj dangj rumz dangj fwn; duz mbaj iq dang de guh mbaw damjdeih, naengh gwnz de yietnaiq. Seizneix, mbawfaex iq baengzyoux engq lai lo, de simmaez dangqmaz bae!

Mbawfaex iq diuq daengz ndaw naz, sawqmwh dingqnyi miz vunz caeuq de gangjvah. De ngeux gyaeuj dauq baez yawj, yienzlaiz dwg duz nonheu iq ndeu. Seizdoeng yaek daengz lo, mbwn ngoenz beij ngoenz nit, mbawfaex iq bienqbaenz fanmoeg duz nonheu iq. Duz nonheu iq lau mbawfaex iq deng nit, couh caeuq mbawfaex iq doengzcaez ndonj haeuj ndaw namh bae, doxiu bilaeng seizcin caiq doengzcaez guhcaemz.

（Gu Yinjgyah）