Ngoenzneix, gou caeuq bohmeh caez bae bouqhaeux laj laeuz gwn haeux. Gwn liux le dou couh byaij ma ranz lo, youq gwnz loh sawqmwh bungz doengzhag gou Daeglungz.

Daeglungz raemxda rim da, yienghceij de cojgvaq dangqmaz. Bingzseiz youq hagdangz, Daeglungz couh lumj coh de ityiengh, dwg duzlungz vaiqvued ndeu, coengzlaiz mbouj raen de yienghneix siengsim gvaq. Gou raen geizgvaiq, cam de:“Daeglungz, mwngz baenzlawz la?” Daeglungz sikhaek raemxda doekbyoegbyoeg, de doq daej doq gangj: “Bohmeh gou doxceng lo, gyoengqde naemj lizvwnh……”

Dou riengz laeng Daeglungz bae daengz dieg bohmeh de doxceng haenx. Daxboh gou lumhlumh gyaeuj Daeglungz, naeuz:“Vaiq bae gienqgienq gyoengqde.” Daeglungz ngamq byaij dep daxmeh de, daxmeh de couh naeuz: “Dou mbouj aeu mwngz lo!” Daeglungz engqgya nanzgvaq lo, ndwn gwtngwt youq henz, mbouj gamj gangj saek coenz, raemxda lae mbouj dingz. Daxmeh gou ngamq siengj gangj di gijmaz, daxboh Daeglungz couh naeuz: “Mbouj gven sou saeh, sou vaiq baema.” Dou cijndaej lizhai lo.

Youq gwnz loh maranz, gou itcig siengj Daeglungz, raen de caen dwg cojgvaq lai lo. Maqmuengh bohmeh Daeglungz caeux di doxndei, aenvih lwgnyez miz bohmeh gyaez, miz bohmeh ndiep cij vuenyungz ha!

(Cangh Yinhyij raiz Ouh Caijfangh hoiz)