daeng guhlawz rongh ndaej ne? Boh naeuz dienh dwg daj dienhsienq ndonj haeuj ndaw bopdaeng bae, yienghneix dienhdaeng couh rongh lo.

Dienh ak lai bw. Boh lwnh gou, miz dienh le, souhyinhgih cij rox gangj vah guhfwen, vunz ndaw dienh’ingj cij rox ning rox cak.

Dienh ndaej coengh bouxguhnaz nienj haeux muz mienh, ndaej coengh boux- guhhong hai gihgi; dienh ndaej hawj aenrug ndatyanyan bienq liengzsisi, ndaej hawj aenrug nitsisi bienq raeujrubrub. Gij saeh dienh rox guh de, sam ngoenz sam hwnz gangj cungj gangj mbouj liux.

Hoeng yiengh dienh baenzlawz ne? Gou mboujcaengz ndaej raen gvaq. Boh naeuz, dienh yawj mbouj raen ne.

Yawj mbouj raen, lumh ndaej lwi? Boh naeuz, goj lumh mbouj ndaej go, dienh mbouj ngah hawj vunz lumh de go. Vunz lumh de le, de couh hozndat, yaek coemh vunz, mbangjseiz lij coemh vunz dai bae dem bw. Va, dienh hoznyaek baenzneix dwglau baenzneix.

Yienznaeuz gou caengz ndaej raen dienh nauq, hoeng gou muengh swhgeij bienqbaenz dienh.

Gou bienqbaenz dienh le, couh ndaej bae coengh bouxguhnaz nienj haeux muz mienh lo, couh ndaej coengh bouxguhhong hai gihgi lo. Gou yaek deuz le, gyoengqde couh mbouj hoj gyo’mbaiq gou nauq, aenvih gyoengqde yawj mbouj raen gou. Langh- naeuz bouxguhnaz, bouxguhhong yawj ndaej raen gou, couh rox gyo’mbaiq gou dahraix, nyaenx gou couh rox najnyaenq lai lo! Boh naeuz, vunz coengh raeuz le, raeuz deng gyo’mbaiq vunz; hoeng raeuz coengh vunz le, couh gaej heuh vunz gyo’mbaiq raeuz nw.

Gou bienqbaenz dienh le, fawhndat, gou couh dawz doenghgij rug ndatyanyan de bienq liengzsisi bae dahraix. Fawhnit, gou couh dawz doenghgij rug nitsisi de bienq raeujrubrub bae dahraix. Vunzlai cungj mbouj rox dwg gou guh, hoeng vunzlai cungj youq ndei youq soeng, yienghneix couh ndei lai lo.

Mwh beixmbauq cuengqhag dauqranz, gou couh hawj souhyinhgih guhfwen, haenqsing cam beixmbauq naeuz: “Beix yawj raen gou lwi? Beix rox gou youq gizlawz lwi?” Gou yawjraen beix, hoeng beix yawj mbouj raen gou, mizyinx lailai bw. Langhnaeuz beix lumj guh gaemhndoj yienghde lox gou naeuz: Beix yawjraen nuengx lo, nuengx youq gizde, beix yawjraen lo, nuengx okdaeuj rouz di vei. Gou coj mbouj saenq de nauq, aenvih dienh yawj mbouj raen go, bouxlawz lij hawj de yaeuh ne. Beixmbauq mbouj miz banhfap saek di, aiq rox ndonj haeuj laj mbonq bae ra gou bw, gou couh rox riu ok sing dahraix. Riu ok sing goj mbouj lau ne, fanjcingq beixmbauq yawj mbouj raen gou, aenvih gou dwg dienh, mizyinx lailai bw.

Hoeng, bienqbaenz dienh le mbangj- baez goj mbouj ndei geijlai. Gou bienqbaenz dienh le, couh mbouj ndaej naengh youq gwnz gyaeujhoq daxboh dingq daxboh gangj gojgaeq lo; goj mbouj ndaej cup daxmeh, mbouj ndaej demh gwnz gen daxmeh ninz lo. Aenvih dienh mbouj ngah hawj vunz red, red deng le de couh coemh vunz, gou guhlawz ndaej hawj bohmeh deng coemh ne? Langhnaeuz gou bienqbaenz dienh dahraix le, gou couh mbouj hoznyaek baenzlai lo, mbouj dwglau baenzlai lo.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngz- meh/卢奋长 hoiz）

Dienh