Ciuqgonq dang bing bae,

Mingh lumj maesienq nyieg.

Vunzcaen song doxbiek,

Yaek bae dieggyae hen.

Rumznit daj baek daeuj,

Buh mbang mbaeu lumj bwn.

Youq namz bingh lai hwnj,

Seizciengz mbwn dumz raeuj.

Mbwn laep nanz ndaej ninz,

Youq gwnz rin liengz neix.

Youh ngiengx yawj ndaundeiq,

Vanzlij geiq vunz ranz.

Bin hwnj ndoi cien sang,

Gvaq dah gvangq bak leix.

Laz gyong gok diendeih,

Cax nangx neix lau lai.

Bing nem cienggun ok,

Diegmoeb ndok hau lai.

Byawz rox geij boux dai?

Dieghoenx raiz sawlwed.

15 bihaenx bae,

Gofaex heusausau.

80 ndaej ma dauq,

Nae doek hausaksak.

Cien ndoi fanh dah gyae,

Boux vunz baema baeg.

Byaij gvaq raemxdah laeg,

Ranzmbanj yaek yawjraen.

Gwnz roen bungz vunzmbanj,

Doq cam ranz baenzlawz.

“Ranz gou youq gizlawz?

Lij miz byawz youq ranz?”

“Dieg haenx dwg ranz mwngz,

Yawj coh fwngz gou vix.

Diegmoh liengzsisi,

Couhdwg riz ranz gaeuq.”

Mbouj raen vunzcaen youq,

Bouxlawz coux gou ma.

Laj din lumj aen naz,

Roeggae ra non gwn.

Okbae mbaet byaekcwx,

Dauq cawj dang daeuj gwn.

Feih cit cengqgengz ndwnj,

Henz fwngz fouz vunz buenx.

Ndit ndei haetromh ok,

Ciuq daengz bakdou daeuj.

Gou youq ndaw ranz gaeuq,

Mbouj raen raeuj caeuq rongh.