Haemhneix,

Ndaundeiq lwenqda lumj ngaenz,

Duzronghrib mbin bae mbin dauq,

Daekdaeq heuhgetget, lumj sing cauj lwgduh,

Lwgnyez doxcaij gij ngaeuz guhcaemz,

Ronghndwen ngauzngetnget.

Haemhneix,

Goengq bya doxlienz lumj bwnda,

Raemhngaeuz gocin doxdab,

Roegvameiz gamz raemxraiz gwnz mbawfaex,

Duzmeuz ringx bae ringx dauq,

Naefaiq mbinfoenfoen.

Haemhneix,

Raemxdah hwnjfoedfoed ruz fubfed,

Vunzmbanj ninz caeux mbouj miz geij ranz

daeng rongh,

Lajroq miz roegenq gangjsabsab,

Byoem hau gag bienq ndaem doxdauq,

Yawj gingq riunyumj couh lumj vadauz hai.