Gou mbouj saenq de baenzneix lingz lij deng dai youq baihrog, ngoenzngoenz maqmuengh de rox gag dauqma, yah gou bae cam ranznden raen mbouj raen duzmeuz ranz gou, bouxboux cungj naeuz:“Ha? Duzmeuz mwngz mbouj raen la? Gou hix mbouj ndaej raen gvaq ne.” Gvaq ndaej song ngoenz, lij dwg mbouj raen gij ngaeuz de youq gyawz. Dahbaj naeuz:“Duzmeuz mwngz caen dai lo.” Gou cix mbouj rox gangj maz ndei, ndawsim luenhsausau.

Ngoenz daihsam dwg singgeiz- roek, lwgsai gou Daegveiz moix bungz singgeizroek gyanghaemh couh dauqma. Ngoenzneix, Daegveiz dauq lo, youq rog naj bakdou cingq bungz ranznden, de couh caeuq ranznden dajgangj, gou youq henz bakdou ndwn dwk. De dwg boux vunz maij gangj maij riu, sing hung gvenq, gij sing de lumj lahbah nei dwkbaba. Sawqmwh, gou lumjbaenz dingqnyi gij sing duz- meuz hemq, sing iqetet. Gou nyinh- caen ngengrwz bae dingq baez dem, ha, caen dwg sing duzmeuz hemq.

“Daegveiz, lumjbaenz miz duz- meuz hemq bw! Mwngz dingq yawj- yawj!” Gou angqvauvau hemq lwgsai gou, de sup sing mbouj dajgangj lo, hix ngengrwz dingq. “Wnggai dwg youq henz haenx!” Gou doq gangj fwngz doq vix daihloh. Daegveiz doq ngw duzmeuz heuh “meu meu” doq byaij coh gizde. “Meu meu!” Daegveiz gwq hemq mbouj dingz, miz duz meuz ndeu daj ndaw laep ndonj okdaeuj. Raen dwg duzmeuz ranz gaeq, Daegveiz riengjret buet gvaqbae, umj de dauqdaeuj.

Gou raen duzmeuz ndaej dauq- ma, sim’angq dwk gwq riu ndaej bak haep mbouj hwnjbae, baenzlai ngoenz mbouj raen ma, laihnaeuz de gaenq…… Gou sikhaek buet bae hai bakdou rug daxbaj:“Baj ha, duzmeuz dauqraen dauq lo! Duzmeuz dauqraen dauq lo!” Gangj sat, gou youh ok rog ding bae yawj duzmeuz. Daxbaj hix gaenlaeng gou okdaeuj, raen duzmeuz le hix riunyumnyum, de naeuz duz- meuz:“Baezneix lij okrog bae lwi? Okrog bae cungj mbouj rox dauqma ha?”Gou riuhehe doiq Daegveiz naeuz:“Aiya, lwg ha, sing hung mbangjseiz hix miz gizndei ne. Mwngz naeuz deng mbouj deng? Mwngz baez maranz, sing mwngz hung, duzmeuz youq gizgyae cungj ndaejnyi lo.” Daegveiz riuhaha dwk, yah gou hix maengx fouzbeij. Gou gag naemj, doeklaeng mbouj daihbueg de lo, caih de gwn doxgaiq.

Seiq. Doxmaij Yungz- heih caemhyouq Nanz

Duzmeuz dauqraen dauq, gou couh gietdingh doiq de ndei. Ngeix dwg yienghneix ngeix, mboujliuh gaenq gvaq ndaej geij ngoenz, gou youh ndatheiq lo.

Haetneix, gou ronq byaek seiz, de daeuj nem gou, gou byaij yamq de hix byaij yamq, daeuj lanz loh gou bae. Gou haetneix hwnqdaeuj miz di sim mbouj onj, caemhcaiq daraiz ga unq, ndwn mbouj ndaej maenh geijlai, de lij gwq daeuj lanz loh gou. Gou sikhaek naeuz de:“Bae gizwnq bae, gaej daeuj nem gou!” Hoeng, de lij lumj gaeuq. Gou fwt hat de baez ndeu, de doeksaet lo, sikhaek couh buet- deuz, ndoj haeuj laj daiz bae. Gag ngeix youq laj daiz mbouj ancienz, de yaek ndoj haeuj laj ringj bae. Mboujliuh ndang cangq lai ndonj mbouj haeujbae. De couh buet coh henz bakcauq, yaek yat hwnj gwnz cauq bae. Hoeng, caengz yat ndaej hwnjbae, gaenq deng gou beng de roengzdaeuj lo.

De riengjret ndoj ndaw gungz bae, byawz rox cij ndonj ndaej gyaengh ndang ndeu haeujbae, loh aen caekhaex youq rog. Gou dog caekhaex de, de “meu meu” hemq dwk, diuz rieng baet mbouj dingz, gou raen ndeiriu youh dog de geij baez. Duzmeuz fwt cienq okdaeuj, baezneix de con haeuj laj byozhaz bae ndoj. Hoeng, hix dwg ndoj ndaej mbiengj ndang ndeu ndwi, baenzneix youh deng gou dog de. Deng gou loengh le song sam baez, de mbouj caiq ndoj bae ndoj dauq, mbouj buetdeuz hix mbouj cukcak, couh ninz youq henz din gou caih gou dog de.

Gou doq dog doq cam:“Baezneix mwngz lij bae lanz loh gou lwi? Naeuz mwngz mwngz cungj mbouj dingq- gangj saekdi, seizneix roxhit caengz?” Duzmeuz fonj ndang, “meu” sing ndeu, doiq da ronghrikrik yawj gou. Gou raen de baenzneix ndeigyaez, gaenq mbouj hozndat lo, hoeng lij ndaq de:“Baenzngoenz nem gou, vaq gou mbouj geij nanz couh deng mwngz nyauj ok congh daeuj! Mwngz caen manz lai lo.”

Gou baenzlawz naeuz de seizneix gaenq mbouj miz maz yungh lo, baez hat de de couh rox bae ndoj, doeklaeng saedcaih ndoj mbouj ndaej, hixnaengz couh mbouj buetdeuz lo, caih gou loengh de. Seiz mbouj seiz ngiengxgyaeuj aeu song da daeuj cimyawj gou, caemhcaiq “meu meu” saek sing, lumjbaenz naeuz:“W, gou roxhit le, baezlaeng mbouj guh lo.” Moiz baez cungj dwg yienghneix, gou hix mbouj sij ndaej laebdaeb loengh de, hoeng lij aeu cang guh yiengh hozhwnj swenj de. De lij dwg caem- rwgrwg ninz youq gwnznamh yawj gou, mbouj guhsing. Ai, gou cij ndaej danq gaemz heiq raez he, byaij haeuj bakcauq bae cawj byaek lo. Caen dwgcaengz yaek dai bae! Guh loek saeh le lij cang gij yiengh hojlienz, hawj mwngz mbouj nyaenxsim hat de lai. Hoeng, mbouj daengz geij faencung, de couh lumz gij hit haxbaenh lo, youh hainduj daujluenh moq.

Duz meuz ranz gou caen dwg youh ndeigyaez youh dwgcaengz, doiq de mbouj miz saekdi banhfap, couh baenzneix miz ndaq miz riu gvaqngoenz lo.

（sat）