Meh ha, mwngz okbae gizgyae guhhong, ngoenz- ngoenz cungj angq lai, dwg lwi?

Wgo, gou rox le, meh ngoenzngoenz cungj angq lai.

Aenvih haemh doekgonq meh ok ranz bae gizgyae couh doiq gou naeuz: “Lwg ha, gaej gag bae henz dah caemz raemx bw, langhnaeuz gou mbouj gag bae henz dah guhcaemz le, meh couh hoznet lo, meh couh angqfaengz lo.” —— Meh okbae gizgyae guhhong daengz ngoenzneix, gou mbouj bae henz dah caemz raemx saek baez nauq; mbouj dwg lwg mbouj siengj bae, dwg aenvih lwg yaek hawj meh hoznet, hawj meh angqfaengz.

Meh ha, meh okbae gizgyae guhhong, ngoenz- ngoenz cungj angq lai, dwg lwi?

Wgo, gou saenq, meh ngoenzngoenz cungj angq lai.

Aenvih, banhaet ngoenz meh okbae gizgyae guhhong de, gou daejnga’nga nanznanz bae, boh naeuz: “Lwg ha, gaej daej lo, mwngz baez daej, meh youq baihrog guhhong couh mbouj hoznet mbouj angqfaengz lo.”——Ngoenzde meh okbae gizgyae guhhong daengz ngoenzneix, gou mbouj daej gvaq saek baez bw. Ngoenzlwenz, gou mbouj re deng mbawem gat lwgfwngz, in yaek dai bae, lwed cungj okdaeuj liux, gou cungj mbouj daej nauq——aenvih lwg yaek hawj meh youq gizgyae guhhong goj hoznet goj angqfaengz bw.

（Daj《Bonjsei Sim Lwgnyez》（Veiz Gizlinz raiz）senj okdaeuj, Luz Fwncangz/卢奋长 hoiz）