Baez siengjdaengz duz moubiz iq ranz yahdaiq, gou couh dingj mbouj ndaej gag riu lo.

Ranz yahdaiq baihlaeng ranz ciengx miz duz moubiz iq ndeu, aen ndang de luenzlulu, youq baihlaeng hauhau de, miz gij caekmbanq ndaem lumj baenz duj baenz duj vamoiz, dwkgyaez dangqmaz. Baez daengz ranz yah- daiq, gou cungj bae doj de.

Ngoenz de dwg banringz ngoenzlijbai, daengz ranz yahdaiq, gou mbouj gangj gijmaz, couh beng dahcej bae doj duz moubiz iq. Daeuj daengz laj gyaq makit, cingq raen duz moubiz iq ngaemj gyaeuj gwn doxgaiq, gou raen henz riengh mou daengj miz gaiq nyangjbaet ndeu, cou swnh fwngz gaem hwnjdaeuj, caegcaeg iet daengz gwnz gyaeuj duz mou iq, fwt dwk ret le ret rwz duzmou, liuxle mbouj hawj de yawjraen gou fwt maeuq roengzdaeuj, ndoj youq gok ciengz. Duz mou iq bei le bei rwz, lumjnaeuz gangj：“Boux yakrwix lawz loengh gou？”“Gangj” liux youh ngaemj gyaeuj gwn“ngaiz”lo. Raen duz mou iq mbouj wj gou, gou youh soengz hwnjdaeuj, baet le rieng mou iq mbat ndeu, duz mou iq baet le baet rieng, bak“hwng hwng”geij sing, vanzlij mbouj wj gou. Gou gietdingh caiq doj de mbat ndeu. Gou iet nyangjbaet gvaqbae seiz, duz mou hozhwnj lo, de aj aenbak raezrangrang de, gaemz ndeu couh haeb dawz gaiq nyangjbaet, daz haeuj ndaw cauzmou bae, lij lumj gwn van gwn diemz dwk nyaij hwnjdaeuj. Boihseiz la, gou simvueng le haenq hemq：“Cejbiuj, cejbiuj, mou gwn nyangjbaet bw!”

Dahcejbiuj dingq liux buet gvaqdaeuj, mbouj guenj gijmaz, yamq hung ndeu yat baenaj, hamj gvaq gaiqgiemx, gaem dawz nyangjbaet couh beng ok baihrog daeuj, hoeng deng duz mou iq baez fid, fid haeuj mbiengj wnq bae, gij yiengh neix, riu mbouj ndaej, daej mbouj baenz. Dahcejbiuj sim mbouj fug, soengz hwnjdaeuj, yemj din siengj byaij haeuj gyawj duz mou iq, byawz rox, duz mou iq caz rox“cingzgvang vunzdig”, ngiengx gyaeuj dox- dauq, fozfoz cung daeuj coh cejbiuj, dah cejbiuj lau dwk gipmuengz doiqlaeng, daej lej hemq hwnjdaeuj：“Yahdaiq, gouqmingz ha, duz mou iq haeb vunz la!”

Yahdaiq nyi le couh daeuj, hai sing hat, gyaep duz mou iq deuz, beng cejbiuj okdaeuj. Yahdaiq rubrub gyaeuj cejbiuj, riu naeuz：“Lwg bamz, duz mou iq mbouj haeb vunz, de doj mwngz guhcaemz ndwi!”Gou bekfwngz hemq naeuz：“Dah cejbiuj deng mou haep lo!”Dah cejbiuj hix riu lo.

Gienh saeh neix yienznaeuz gvaq haujlai nanz lo, hoeng gou baez ngeix daengz, cungj riu oksing bae.

（Liuz Swjyangz）