Gou gingciengz gag naengh youq laj cueng, gag caemsim naemj, gij eiqngeih sengmingh dwg gijmaz ne?

Ranz gou ndaem miz go daejhaiz ndeu, godaejhaiz sengmingh giengz rengz, mbouj lumj gij dujva neuznet. Geiq ndaej miz baez ndeu cuengqgyaj, gou caeuq daxboh daxmeh itheij bae dieggyae lijyouz, dangseiz bae gip lai, mbouj ndaej hawj godaejhaiz rwed raemx. Dou bae le cib geij ngoenz, gou laihnaeuz bat godaejhaiz dairoz lo. Byawz rox dou dauqma, de lij lumj gaxgonq ityiengh heuswd. Gou danqhaenh gij sengmingh godaejhaiz giengz rengz, mbouj miz raemx de hix ndaej lix roengzdaeuj.

Miz ngoenz ndeu, gou bae ndaw gunghyenz guhcaemz, baez yamq haeuj diegnywj, sam duz mbungqmbaj sikhaek mbin hwnjdaeuj,gyoengqde humx youq itheij, doengzcaez diuq foux, daih dwggyaez lo. Gou gimq mbouj ndaej gaebdawz duzmbaj ndeu, neix baez yungh rengz couh dawz aendungx de nyaenj vaih lo, gij raemxloeg lae okdaeuj. Gou laihnaeuz de dai lo, couh dawz de vit bae, hoeng de ngamq liz fwngz gou couh yungh rengz mbin hwnjdaeuj, mbin daemqdet doek roengz duj va golinzgaeq bae, dingz youq gwn dujva lo. Gou mbouj gamj caiq gaemh de lo, naengh roengzdaeuj, dauq- ngeix saeh daxbaenh. Gou naemj, gou ra daengz dapanq vwndiz: Sengmingh couhdwg giengz rengz lix youq.

Boux cozgyah Daizvanh Hing Linzswj, hix dwg boux vunz ndiepgyaez sengmingh, insik sengmingh. De cibngeih bi couh baenz cungj bingh heuhguh funghsizsing gvanhcezyenz, daengx ndang gvanhcez cungj deng vaih lo, hengzdoengh mbouj bienh. Hoeng de lij genhciz sij le 40 lai bonj cozbinj mizmingz, ndaej bingzguh “Daizvanh boux vunzcoz maenhndei mizmingz ndeu（gungh cib boux）.”

Gou rox lo, gij eiqngeih sengmingh couh- dwg rengz giengz lix youq, mbouj dingz mbouj duenh. Nanzdauh mwngz mbouj siengj hawj sengmingh swhgeij gyalai saekndei ma? Vaiqdi hengzdoengh ba.

(lauxsae son’gyauq:Mungz Cwngzgen/蒙成建)