Naed cehfaen ndeu ninz youq gyangnamh, sawqmwh de singj lo. De raen seiqhenz raeuj- rubrub, couh iet iet ndang.

De mizdi hozhawq, gwn gvaq di raemx le, de roxnyinh cwxcaih dangq- maz, couh iet iet ndang.

Rumzcin mbaeu- mbengq ci gvaqdaeuj.

Cehfaen cam duz- ndwen:“Singyaem neix dwg gijmaz?

Duzndwen han: “Neix dwg rumzcin. De coi raeuz okbae, boemz youq gyang- namh haenx cungj aeu okbae.”

“Baihrog dwg gijmaz yiengh?”

“Baihrog caeuq gizneix gig mbouj doengz, dwg aen biengz ronghsag ndeu.”

“O, aen biengz ronghsag!” Cehfaen angq raixcaix, youh iet iet ndang.

Ndang cehfaen maj ndaej haujlai lo. De ngengq gyaeuj bae dingq, aen biengz baihrog caen nauhyied. Cawzliux rumzcin, lijmiz sing raemxmboq laecoco, sing duzroeg heuhcaca, sing lwgnyez riuhaha.

“A, gou aeu sikhaek okbae!” Cehfaen youh iet iet ndang, cij raen rongh lwenqda, de gaenq youq baihrog ronghsag lo.

De yawjyawj bonjfaenh, buh heuoiq,vaq hausak, dwggyaez dangqmaz. Caiq yawjyawj seiqhenz, gyoengq doengzdoih cangndang lumj de yienghneix miz haujlai lo. Miz di naeuz: “Gou dwg ngoenzlwenz okdaeuj.” Miz di naeuz: “Gou dwg ngoenzneix okdaeuj.”Miz di naeuz: “Ngoenzcog lijmiz haujlai doengzdoih okdaeuj ne.”

De vaiqvued dangqmaz, ngamq daeuj aen biengz ronghsag neix, couh miz baenzlaiz doengzdoih.

（Yez Swngdauz sij Ouh Caijfangh hoiz）